Հոկտեմբերի 22-ին ՌԴ Վլադիմիրի մարզի կրթության նախարարությունը հրաման է արձակել, որով հանրակրթական դպրոցներում արգելվում է հիջաբ եւ նիկաբ կրել: Խոսքը վերաբերում է իսլամում ընդունված կանացի հագուստներին, որ ծածկում են կնոջ դեմքը:
Ռուսաստանի տարածքում այդ հագուստներն արգելելու նախաձեռնություն «Կրոկուս սիթի հոլի» ահաբեկչությունից հետո ցուցաբերել է ՌԴ Քննչական կոմիտեն: Հիմանավորումն այն է, որ հանրային վայրերում տեղադրված տեսախցիկները նկարահանում են դեմքը ծածկած եւ ամբողջական կանացի կրոնական հագուստ կրող անձանց, ինչը գրեթե անհնար է դարձնում նրանց իդենտիֆիկացումը: Իսկ դա դժվարացնում է իրավապահ մարմինների եւ հատուկ ծառայությունների աշխատանքը:
Հարցին դեռեւս ամբողջական լուծում չի տրվել: Իսկ Վլադիմիրի մարզի կրթության նախարարության հրամանը խիստ դժգոհություն է առաջացրել Հյուսիսային Կովկասի մուսուլմանների համակարգող կենտրոնում:
Վերջինս հանդես է եկել հայտարարությամբ, որտեղ «աղջկական գլխաշորի դեմ պայքարի մարտիկներին» խորհուրդ է տրվում զբաղվել իրենց իսկական պարտականություններով՝ «ջանքեր գործադրեին, որպեսզի հանրակրթական ուսումնական հաստատություններում ձեւավորվեն Ռուսաստանին յուրահատուկ բարոյա-հոգեբանական արժեքներ, կանխեին ապակառուցողական գաղափարախոսությունը, աջակցեին Հատուկ ռազմական գործողությանը, որ իրականում երկրի հիմնական առաքելությունն է»:
Հյուսիսային Կովկասի մուսուլմանների կոորդինացիոն կենտրոնը կրթության ոլորտի պատասխանատուներից պահանջում է «վերջ տալ կրոնական հագուստի դեմ ամբոխավարական պայքարին»։
Սա չափազանց լուրջ ահազանգ է, մանավանդ որ ընդգծվում է Հատուկ ռազմական գործողության, այսինքն՝ ռուս-ուկրաինական պատերազմի հանգամանքը: Ենթատեքստով հասկացվում է, որ «այն ժամանակ, երբ Ռուսաստանի մուսուլմաններն իրենց պարտքը բարեխիղճ կատարում են եւ կռվում Ուկրաինայի դեմ, ռուս պաշտոնյաները մուսուլմանական սովորույթների դեմ պայքար են սկսել»։
Խնդրին ի՞նչ լուծում կտա Ռուսաստանի դաշնային իշխանությունը: Երկիրը փաստացի ենթարկվել է իսլամական արմատականության տարածման եւ արմատավորման սպառնալիքի, մյուս կողմից, սակայն, բանակն ունի չեչենական հատուկ նշանակության զորախմբի, առհասարակ Հյուսիսային Կովկասի մարտունակ ուժերի կարիքը:
Ուկրաինայի դեմ պատերազմի պատճառով Ռուսաստանը բախվում է բազմաթիվ խնդիրների՝ սոցիալականից մինչեւ հանցավորության աճ: Բայց Հյուսիսային Կովկասից հնչած ահազանգն արդեն ռազմական եւ նույնիսկ աշխարհաքաղաքական հետեւանքներ կարող է ունենալ:
Թիվ 1 սյունակ, Վահրամ Աթանեսյան
