Եվրահանձնաժողովը հայտարարել է, որ հինգ տարի ժամկետով մինչև 35,3% «վերջնական փոխհատուցման մաքսատուրքեր» կսահմանի Չինաստանից էլեկտրական շարժիչով մեքենաների (BEV) ներմուծման վրա։ Այս մասին հայտնել է Եվրահանձնաժողովի մամուլի ծառայությունը։
Բրյուսելում անցկացված հետաքննությունը պարզել է, որ Չինաստանում ավտոարտադրողներն օգուտ են ստանում «անարդար սուբսիդավորումից», ինչը տնտեսական վտանգ է ներկայացնում ԵՄ արտադրողների համար: Մաքսատուրքերը կհասնեն 35,3 տոկոսի՝ կախված մատակարարներից։
Չինական էլեկտրամոբիլների հետաքննության մասին հայտարարել է Եվրահանձնաժողովի նախագահ Ուրսուլա ֆոն դեր Լայենը 2023 թվականի սեպտեմբերի 13-ին՝ Եվրոպական միության վիճակի վերաբերյալ Եվրախորհրդարանում իր ելույթի ժամանակ։
Ըստ Եվրահանձնաժողովի՝ «այս որոշումը պայմանավորված է վերջերս Չինաստանից ԵՄ էժան էլեկտրամոբիլների արտահանման արագ աճով»:
Չինաստանը Եվրահանձնաժողովի այդ որոշման դեմ բողոքել է Առևտրի համաշխարհային կազմակերպությանը, հայտնում է South China Morning Post-ը։
Զուգահեռաբար ԵՄ-ն և Չինաստանը շարունակում են աշխատել Առևտրի համաշխարհային կազմակերպության հետ համատեղելի այլընտրանքային լուծումներ գտնելու ուղղությամբ, որոնք արդյունավետ կլինեն բացահայտված խնդիրները վերացնելու հարցում, նշել է Բրյուսելը։
Եվրահանձնաժողովը բաց է նաև առանձին արտահանողների հետ բանակցությունների համար:
