Աշխարհի առաջին փայտե արբանյակը, որը կառուցվել է Ճապոնիայում, տիեզերք է արձակվել ամերիկյան Space X ընկերության առաքելության շրջանակներում: Այս մասին հայտնում է Reuters-ը:
Կիոտոյի համալսարանում մշակված փայտե LignoSat արբանյակը կհասցվի Միջազգային տիեզերակայան (ՄՏԿ) և ուղեծիր դուրս կգա Երկրից մոտ 400 կմ բարձրության վրա։ Գործակալությունը նշում է, որ այս առաքելության նպատակն է լինելու «ցուցադրել վերականգնվող նյութերի տիեզերական ներուժը»։
«Փայտով, նյութով, որը մենք կարող ենք ինքներս արտադրել, մենք կկարողանանք տներ կառուցել և հավերժ ապրել ու աշխատել տիեզերքում», -բացատրում է տիեզերագնաց և Կիոտոյի համալսարանի հետազոտող Տակաո Դոյը:
Առաջիկա 50 տարիների ընթացքում նա և իր թիմը նախատեսում են նաև սկսել ծառեր տնկել և փայտե տներ կառուցել Լուսնի և Մարսի վրա:
Կիոտոյի համալսարանի պրոֆեսոր Կոջի Մուրատայի խոսքով՝ փայտը պետք է ավելի դիմացկուն լինի տիեզերքում, քան Երկրի վրա՝ ջրի և թթվածնի բացասական ազդեցության բացակայության պատճառով։
«1900-ականների սկզբին ինքնաթիռները պատրաստվում էին փայտից։ Պետք է հնարավոր լինի նաև փայտե արբանյակ», – ասաց նա։
