Թուրքիայի նախագահ Թայիփ Էրդողանը հայտարարել է, որ վստահ է՝ ուկրաինական հակամարտության արագ լուծումը հնարավոր է, եթե ԱՄՆ նորընտիր նախագահ Դոնալդ Թրամփի վարչակազմը դրսևորի համապատասխան կամք և մտադրություն։
«Արևմտյան որոշ երկրների՝ Միացյալ Նահանգների գլխավորությամբ, Ուկրաինայում պատերազմին վերջ տալու ջանքերը կարագացնեն այս հակամարտության լուծումը: Մենք հենց սկզբից ընտրել ենք խաղաղության կողմը:
Մենք նաև տեսանք, որ Արևմուտքը բավարար չափով չի կիսում մեր վստահությունը, որ այս խնդիրը կարող է լուծվել դիվանագիտական ճանապարհով։
Եթե տեսնենք, որ ԱՄՆ-ի վարչակազմը՝ Թրամփի գլխավորությամբ, մոտենում է այս հարցին կարգավորման տեսանկյունից, ապա մենք հեշտությամբ կարող ենք վերջ տալ այս պատերազմին»,-ասել է Էրդողանը լրագրողներին Ղրղզստան և Հունգարիա կատարած այցերից հետո։
