Ադրբեջանի ResPlatforma հասարակական-քաղաքական շարժումը նոյեմբերի 8-ին COP29-ի բոլոր մասնակից երկրների պատվիրակություններին ուղղված հայտարարություն է տարածել:
Փաստաթղթում, որից հատվածներ է փոխանցել MeydanTV առցանց ռեսուրսը, մասնավորապես ընդգծված է, որ 2023թ. նոյեմբերից ի վեր Ադրբեջանի իշխանությունները քաղաքական ընդդիմախոսների, ՀԿ-երի, քաղաքացիական ակտիվիստների եւ ոչ իշխանական մամուլի դեմ բռնությունների եւ հետապնդումների աննախադեպ արշավ է սկսել:
ResPlatforma-ն մասնավորապես վկայակոչել է կառույցի խոսնակ Ակիֆ Գուրբանովի եւ Խորհրդի անդամ Ռուսլան Իզեթլիի կալանավորումը, որ տեւում է արդեն մի քանի ամիս եւ ամեն անգամ իշխանությունների քաղաքական ցուցումով դատարանի կողմից երկարաձգվում, թեեւ նախաքննության մարմինը նրանց նկատմամբ ընդամենը մեկ քննչական գործողություն է իրականացրել՝ ներկայացնելով անհիմն մեղադրանք։
Հայտարարության հեղինակները Կլիմայի հարցերով ՄԱԿ-ի միջազգային խորհրդաժողովի մասնակից երկրներին հիշեցնում են, որ միջազգային բոլոր հեղինակավոր իրավապաշտպան կազմակերպությունները Բաքվի բանտերում պահվող քաղաքացիական ակտիվիստներին եւ լրագրողներին ճանաչել են քաղբանտարկյալ-խղճի կալանավոր:
Նրանք հատկապես վկայակոչել են AbzasMedia լրատվամիջոցի տնօրենի, գլխավոր խմբագրի եւ բոլոր լրագրողների կալանավորումը: Նրանք մեղադրվում են արտարժույթի մաքսանենգության մեջ:
Քրեական գործն, ինչպես հայտարարությունն է ասում, հարուցվել է Ադրբեջանի իշխանությունների անմիջական ցուցումով:
Պատճառն այն է, որ լրատվամիջոցը կոռուպցիայի, կաշառակերության, ապօրինի ձեռնարկատիրությամբ զբաղվելու, պաշտոնյաների, այդ թվում՝ իշխող ընտանիքի կողմից արտերկրում ձեռք բերված գերթանկարժեք անշարժ գույքի եւ այլ հարցերի շուրջ հետաքննություններ է նախաձեռնել:
Խմբագրության շենքում եւ աշխատակիցների տներում ու բնակարաններում կատարված ապօրինի խուզարկությունների ժամանակ առգրավվել են համակարգիչները, էլեկտրոնային կրիչները, լրագրողների սմարթֆոնները, պլանշետները, տեխնիկական մյուս բոլոր սարքավորումները, որ կարող են լրագրողական հետաքննության արդյունքում ձեռք բերված տեղեկություններ պարունակել, ջնջվել են youtube-յան ալիքում բոլոր տեագրությունները:
Հայտարարության հեղինակներն առանձին կետով անդրադարձել են դատական իշխանության կախվածությանը:
«Ադրբեջանի դատական ոչ մի ատյան ոչ մի գործով արդարացի քննություն չի իրականացնում եւ գործադիր իշխանությունից անկախ վճիռ չի կայացնում»-հավաստիացնում են նրանք եւ ավելացնում, որ դատարանը նույնիսկ ոստիկանության աշխատակիցների եւ պահնորդական ծառայության դեմ է անզոր. բոլոր մեղադրյալները դատարան են բերվում ձեռնաշղթաներով, մինչեւ նիստի սկիզբը պահվում փակ սենյակում՝ ոտքի վրա կանգնած վիճակում:
Ամփոփելով մարդու նկատմամբ աննախադեպ խոշտանգումների թվարկումը, հայտարարության հեղինակները միջազգային խորհրդաժողովի մասնակից երկրների առաջնորդներին, պատվիրակությունների ղեկավարներին կոչ են անում «անշահախնդիր եւ հետեւողական լինել Ադրբեջանի իշխանությունների հետ հարաբերություններում, պահանջել, որպեսզի քաղբանտարկյալներն ազատ արձակվեն»:
Նրանք, ընդսմին, գտնում են, որ քաղբանտարկյալներին ոչ թե պետք է ներում շնորհվի, այլ նրանց նկատմամբ կայացվի արդարացման դատական վճիռ:
Վերջին մի քանի օրերին աշխարհի տարբեր երկրներում ադրբեջանական քաղվտարանդիությունը բողոքի ցույցեր, երթեր եւ պիկետներ է կազմակերպել՝ պահանջելով, որ ժողովրդավարական երկրները բոյկոտեն Կլիմայի հարցերով Բաքվում ՄԱԿ-ի կազմակերպած խորհրդաժողովը՝ «քանի դեռ երեք հարյուր քաղբանտարկյալներ հեծում են անազատության մեջ»:
Ադրբեջանի ԱԳՆ-ն համարում է, որ այդ «հակապետական միջացառումները հովանավորում են ադրբեջանական ժողովրդի եւ նրա անկախ պետականության երդվյալ թշնամիները»։
Թիվ 1 սյունակ, Վահրամ Աթանեսյան
