Ուկրաինան ունի ընդամենը 50 ամերիկյան ATACMS հրթիռ. The Times

Ուկրաինական զինված ուժերն ունեն ընդամենը 50 ATACMS մարտավարական հրթիռ, որոնք կարող են օգտագործվել Ռուսաստանի տարածքի խորքում գտնվող թիրախները խոցելու համար, գրում է բրիտանական The Times պարբերականը։

Պարբերականը նաև նշել է, որ «Ուկրաինան ունի բավականաչափ HIMARS և այլ հրթիռային կայաններ՝ դրանք արձակելու համար»:

Վաշինգտոնի պատերազմի ուսումնասիրության ինստիտուտի տվյալներով՝ 300 կմ շառավղով ATACMS հրթիռները կարող են սպառնալ մոտ 245 ռուսական ռազմական օբյեկտի՝ ավիաբազաներից մինչև զինամթերքի պահեստներ։

Միաժամանակ Պենտագոնի խոսնակ Սաբրինա Սինգհը հրաժարվել է հաստատել տեղեկությունն այն մասին, որ ԱՄՆ նախագահ Ջո Բայդենը թույլատրել է Ուկրաինային ամերիկյան հրթիռներ օգտագործել ռուսական տարածքի խորքերին հարվածելու համար։

Նա նաև հրաժարվել է մեկնաբանել ՌԴ պաշտպանության նախարարության հաղորդագրությունն այն մասին, որ նախօրեին Բրյանսկի շրջանում ATACMS հրթիռներ են խոցվել։

Երեքշաբթի ՌԴ ՊՆ-ն հայտնել էր, Ուկրաինայի զինված ուժերը ամերիկյան արտադրության 6 ATACMS հրթիռով հարձակվել են Բրյանսկի մարզում գտնվող օբյեկտի վրա, խոցվել է հինգ հրթիռ, մեկը՝ վնասվել։