Ռումինիայում անցկացվում է նախագահի ընտրություն

Ռումինիայում մեկնարկել է նախագահի ընտրությունը։

Ժամը 7:00-ին (Երևանի ժամանակով 9:00-ին) ողջ երկրում բացվել է շուրջ 19 հազար ընտրատեղամաս, հայտնում է «ՌԻԱ Նովոստին»։ Դրանք կգործեն մինչև ժամը 21:00-ն (Երևանի ժամանակով ժամը 23:00-ը):

Ռումինիայի քաղաքացիները, որոնք բնակվում են արտերկրում, կքվեարկեն 3 օր անընդմեջ՝ նրանց համար ընտրատեղամասերը բացվել են դեռևս նոյեմբերի 22-ին:

Պետության ղեկավարն ընտրվում է հինգ տարով։ Մասնակցության շեմ չկա, ընտրությունները կայացած կհամարվեն մասնակիցների ցանկացած քանակի դեպքում։

Ռումինիայի նախագահի պաշտոնին հավակնում է 13 թեկնածու:

Հաղթող կճանաչվի այն թեկնածուն, որը կստանա ընտրողների ձայների կեսից ավելին։ Եթե ոչ ոք չհավաքի անհրաժեշտ թվով ձայներ, երկու շաբաթ անց կանցկացվի երկրորդ փուլ, որտեղ հաղթելու համար պետք է ստանալ պարզ մեծամասնություն։