Մերձավոր Արեւելքի հարցերով ԱՄՆ նախագահի ավագ օգնական Ամոս Հոխշտեյնը Բեյրութում եւ Երուսաղեմում բանակցություններից հետո վերադարձել է Վաշինգտոն: Ըստ տեղեկությունների, որ իսրայելական մամուլը փոխանցում է՝ հղում անելով արաբական աղբյուրներին, Լիբանանի եւ Իսրայելի իշխանություններն ընդունել են հրադադարի հաստատման ամերիկյան ծրագիրը:
Նոյեմբերի 25-ին հայտնի է դարձել, որ փաստաթղթին պաշտոնական հավանություն տալու հարցով Իսրայելի ռազմական կաբինետը նիստ կգումարի երեքշաբթի՝ նոյեմբերի 26-ին: Համաձայնագրի հիմքում դրված է ՄԱԿ-ի Անվտանգության խորհրդի թիվ 1701բանաձեւը, որ ընդունվել է 2006 թվականին՝ իսրայելա-լիբանանյան երկրորդ պատերազմից հետո:
Ըստ այդմ, նախատեսվում է հաստատել 60-օրյա հրադադար: Այդ ընթացքում «Հեզբոլլան» իր ռազմական խմբավորումները պետք է հեռացնի Լիթանի հետից հյուսիս, իսրայելա-լիբանանյան միջազգայնորեն ճանաչված սահմանի հսկողությունը կստանձնի Լիբանանի կանոնավոր բանակը, որին կօժանդակեն ՄԱԿ-ի խաղաղապահ ուժերը:
Այդ պայմանավորվածությունները կատարելուց հետո Իսրայելի բանակը լիովին կհեռանա Լիբանանի տարածքից: Vesty.go.il –ը, սակայն, հայտնում է, որ բուն համաձայնագրին կից մշակվել է իսրայելա-ամերիկյան պայմանավորվածությունների հավելված: Այն նախատեսում է, որ Իսրայելը Լիբանանի տարածքում «Հեզբոլլայի» դեմ պատժիչ գործողությունների իրավունք կունենա, եթե համաձայնագրի որեւէ կետ խախտվի կամ Իսրայելի տարածքը ենթարկվի հրթիռային եւ ԱԹՍ-երի հարձակման:
Ամերիկյան մամուլի տեղեկություններով՝ Վաշինգտոնում սպասում են, որ Իսրայելի ռազմական կաբինետը կհաստատի «Հեզբոլլայի» հետ հրադադարի համաձայնագիրը, եւ ԱՄՆ նախագահ Ջո Բայդենը նոյեմբերի 28-ին կհայտարարի, որ Լիբանի հարավում պատերազմը դադարել է:
Փորձագիտական կարծիք կա, որ «Հեզբոլլայի» դիրքորոշման վրա մեծ ազդեցություն է գործել Իրանը: Այդպիսով Գազայի հատվածի եւ Լիբանանի հարավի խնդիրներն առանձնացվել են:
Համարվում է, որ նախնական պայմանավորվածություններն իրավական փաստաթղթով ամրագրելու դեպքում Միացյալ Նահանգների հեռացող նախագահն իր հաշվում դիվանագիտական մեծ հաջողություն կգրանցի:
Ամեն ինչ թվում է «ոսկերչական ճշգրտությամբ մշակված»։ Այդուհանդերձ, խնդիրը միջնոդավորված է մի շարք երկրների շահերով, եւ գործարքը ցանկացած պահի կարող է չեղյալ հայտարարվել:
Նոյեմբերի 25-ին Ռուսաստանի նախագահի մամուլի քարտուղար Դմիտրի Պեսկովը խիստ ենթատեքստային հայտարարություն է արել, որ պետք է մշակվեն Մերձավոր Արեւելքի հակամարտության գոտիներ մարդասիրական օգնություն հասցնելու այլ երթուղիներ:
Գազայի հատվածում պատերազմը շարունակվում է արդեն տասնչորս ամիս, Լիբանանում՝ հոկտեմբերի սկզբից:
Թե ինչու՞ է Մոսկվան այս փուլում, երբ ԱՄՆ դիվանագիտական ջանքները կարող են որոշակի հաջողության հասնել, խոսում Մերձավոր Արեւելք «մարդասիրական օգնություն հասցնելու այլ երթուղիներ ստեղծելու ահնրաժեշտությունից»՝ մնում է միայն ենթադրել: Նույն տեղում Դմիտրի Պեսկովը դրական է արտահայտվել ընտրված նախագահ Թրամփի եւ նրա թիմի մասին, որ Ուկրաինայի մասին խոսելիս օգտագործում են «խաղաղություն» եւ «խաղաղ կարգավորում» արտահայտությունները, իսկ հեռացող Բայդենին՝ անվանել «էսկալացիոնիստ»:
Իսրայելա-լիբանանյան հրադադարը հնարավորություն է, որպեսզի առաջընաց արձանագրվի նաեւ Գազայի հարցով բանակցություններով:
Մերձավորարեւելյան կարգավորման ամերիկյան նախաձեռնության հաջողությունն այդ բարդ տարածաշրջանում Ռուսաստանի ազդեցության թուլացում կնշանակի:
Բայդենի նոյեմբերի 28-ը տրիում չի լինի, եթե անգամ իսրայելա-լիբանանյան կարգավորման փաստաթուղթ ստորագրվի, բայց հրադադարի հերթական ձախողումը Միացյալ Նահագներին շատ ծանր կորուստներ կարժենա:
Թիվ 1 սյունակ, Վահրամ Աթանեսյան
