Ազգային ժողովում՝ բյուջեի նախագծի վերջնական քննարկման ժամանակ, իր եզրափակիչ ելույթում ՀՀ վարչապետ Նիկոլ Փաշինյանը, հիշեցնելով, որ վաղը՝ դեկտեմբերի 7-ին, 1988 թվականի աղետալի երկրաշարժի տարելիցն է, հայտարարեց.
-2020 թվականի պետական բյուջեով աննախադեպ մեծ թիվ է տրամադրվել աղետի գոտու խնդիրներին՝ 3 մլրդ դրամ։
Վարչապետը եւս մեկ անգամ վերահաստատեց իր այն պնդումը, որ 2020-ի բյուջեն, այո՛, հեղափոխական է։ Եվ հեղափոխական է նաեւ աղետի գոտու խնդիրները լուծելու առումով։ Փաշինյանն ընդգծեց, որ տեսանելի ժամանակաշրջանում երբեք այսպիսի ծավալների, նույնիսկ դրան մոտիկ գումար չի տրամադրվել՝ նշյալ խնդիրների լուծման համար։
Սրանով Կառավարությունը 2020-ին լուծում է բոլոր այն քաղաքացիների հարցերը, որոնց նկատմամբ ՀՀ ունեցած պարտավորությունը դե յուրե արձանագրված է։ Սա, վարչապետի խոսքով, նշանակում է, որ աղետի գոտու վերականգնման գործընթացում նոր փուլ է սկսվում, որը պիտի իրագործվի լրիվ այլ տրամաբանությամբ, եւ այդ փուլի իմաստը սոցիալական արտակարգ իրավիճակի տրամաբանությունը վերափոխելն է զարգացման տրամաբանությամբ․
«Գյումրի քաղաքը պետք է ազատվի տնակներից»․- հայտարարեց գործադիրի ղեկավարը:
«Ընդ որում, սա չի նշանակում, որ տնակներում ապրող քաղաքացիների նկատմամբ պետությունն ունի պարտավորություն, բայց սա չի էլ նշանակում, որ ոչ մեկի նկատմամբ չի կարող չունենալ պարտավորություն։ Մենք ամեն տնակի պատմությունն արդեն իսկ ձեւավորել ենք, եւ ամեն տնակի նկատմամբ կլինի անհատական մոտեցում։ Բայց դա այսօր Գյումրու պոտենցիալը, որպես զարգացած քաղաքի, խոչընդոտող թիվ մեկ գործոնն է։ Նոր փուլ է բացվում 1988 թվականի երկրաշարժի հետեւանքները հաղթահարելու գործում»։
