1988 թվականի դեկտեմբերի 7-ին՝ 31 տարի առաջ՝ ժամը 11։41-ին, երկրաշարժը, որի ուժգնությունն էպիկենտրոնում 10 բալ էր, ցնցեց Հայաստանի հյուսիսը։ Սպիտակի երկրաշարժն ավելի քան 25 հազար մարդու կյանք խլեց։ Ավելի քան 500 հազար մարդ անօթևան մնաց։ Երկրաշարժն ընդգրկեց ՀՀ տարածքի մոտ 40 տոկոսը: Տուժեց 21 քաղաք և շրջան, 342 գյուղ: Լրիվ կամ մասնակի ավերվեցին Սպիտակ, Լենինական, Կիրովական, Ստեփանավան քաղաքները, Սպիտակի, Ախուրյանի, Գուգարքի, Արագածի, Կալինինոյի, Ստեփանավանի շրջանների հարյուրից ավելի գյուղեր ու բնակավայրեր:
Փլուզված զանգվածների տակ հայտնվեցին տասնյակ հազարավոր մարդիկ։ Ավերվեցին գործարաններ, դպրոցներ, հիվանդանոցներ։ ԽՍՀՄ հանրապետությունները, օտարերկրյա պետություններն օգնության ձեռք մեկնեցին Հայաստանին։
2020 թվականի բյուջեով կառավարությունը 3 միլիարդ դրամ է հատկացնելու աղետի գոտու ընտանիքներին բնակարան տրամադրելու համար։
