Ուկրաինայի, Լատվիայի, Լեհաստանի և Չեխիայի արտաքին գործերի նախարարները լքել են ԵԱՀԿ ԱԳ նախարարների խորհրդի նիստերի սենյակը Ռուսաստանի արտգործնախարար Սերգեյ Լավրովի ելույթից առաջ։
Ուկրաինայի ԱԳՆ-ն հայտնել է , որ գերատեսչության ղեկավար Անդրեյ Սիբիգան հանդիպման սենյակից դուրս գալուց առաջ Լավրովին անվանել է «ռազմական հանցագործ»։
Նրան հետևելով մի շարք արտգործնախարարներ և դիվանագետներ լքել են դահլիճը։ Դա, մասնավորապես, արել են Չեխիայի ԱԳՆ ղեկավար Յան Լիպավսկին , Լատվիայի արտաքին գործերի նախարար Բայբա Բրազեն, Լեհաստանի և Վրաստանի արտգործնախարարներ Ռադոսլավ Սիկորսկին և Մակա Բոչորիշվիլին։
Ուկրաինայի արտաքին գործերի նախարարության ներկայացուցիչ Գեորգի Տիխին «Եվրոպական պրավդա»-ին ասել է , որ դահլիճը լքել են նաև Ռումինիայի, Լիտվայի և Էստոնիայի պատվիրակությունների ներկայացուցիչները։
Մալթայի մայրաքաղաք Վալետայում ընթանում է ԱԳ նախարարների խորհրդի 31-րդ նիստը։ Միջոցառման նախօրեին ՌԴ ԱԳՆ-ն հայտարարեց ԵԱՀԿ-ի «ինստիտուցիոնալ ճգնաժամի» մասին, որը, ըստ ռուսական կողմի, «արևմտյան մի շարք երկրների ապակառուցողական գործողությունների հետևանք էր»։
Չնայած դրան, Լավրովը, ով գտնվում է ԵՄ պատժամիջոցների տակ, եկավ Մալթա։
ՌԴ ԱԳՆ պաշտոնական ներկայացուցիչ Մարիա Զախարովային չեղարկել են նախկինում տրված վիզան (նրան բացառության կարգով վիզա են տվել, քանի որ նա նույնպես ԵՄ պատժամիջոցների ցանկում է)։
Լատվիան, Լիտվան և Էստոնիան դեմ են արտահայտվել այս բացառմանը։ Լավրովի մասնակցության պատճառով, գրում է BBC-ի ռուսական ծառայությունը , Լիտվայի և Էստոնիայի արտաքին գործերի նախարարությունների ղեկավարները հրաժարվել են մասնակցել Նախարարների խորհրդի նիստին։
