Տասերորդ օրն է, ինչ Թբիլիսիում բողոքի զանգվածային ակցիաներ են: Ինչպես նկատել է արեւմտյան մի լրագրող, «մարդիկ Ռուսթավելի պողոտայում հավաքվում են նույն կարգապահությամբ, ասես գնում են աշխատանքի»:
Ցուցարարների թիվը չի նվազում, չնայած որ նրանց նկատմամբ ոստիկանությունը կիրառում է արցունքաբեր գազ, ջրցան մեքենաներ: Ընդդիմությունն արձանագրում է, որ ֆորմալ ուժային կառույցների փոխարեն «Վրացական երազանքը» գործի է դրել «մահվան էսկադրոններ»: Խոսքը Թբիլիսիի կենտրոնական փողոցներում գիշերային ժամերին հայտնվող խմբերի մասին է: Նրանք քաղաքացիական հագուստով են՝ «ամբողջովին սեւ» եւ հարձակվում են ցուցարարներից առանձնացած մարդկանց վրա, ֆիզիկական բռնության ենթարկում, նույնիսկ առեւանգում:
«Մահվան էսկադրոնները» հարձակվել են «Փիրվելի» հեռուստաընկերության նկարահանող խմբի վրա, առգրավել նկարահանող սարքավորումները, դաժան ծեծի ենթարկել օպերատորին եւ լրագրողին: Այդ փաստի առթիվ ընդդիմադիր չորս կուսակցությունները համատեղ հայտարարություն են տարածել եւ «Վրացական երազանք» կուսակցության առաջնորդ Բիձինա Իվանիշվիլիին մեղադրել «ապօրինի զինված խմբավորումներ ստեղծելու» մեջ:
Ներքաղաքական լարվածության օրերին Վրաստանի նախագահ Սալոմե Զուրաբիշվիլին մեկնել է Փարիզ եւ մասնակցել Աստվածամոր տաճարի վերաբացման հանդիսություններին:
«Ես խորքային քննարկում ունեցա նախագահ Թրամփի հետ: Վրաստանն ունի ուժեղ ԱՄՆ-ի կարիքը: Աստված պահապան Ամերիկային»,- սոցիալական ցանցում այս բովանդակության գրառում է կատարել նա:
Զուրաբիշվիլիի լիազորությունները մի քանի օրից ավարտվում են: Իշխող կուսակցությունը մտադիր է նախագահի ընտրություններ անցկացնել: Զուրաբիշվիլին այդ ընտությունները ոչ լեգիտիմ է որակել, քանի որ խորհրդարանը նրա կարծիքով հակասահմանադրական է: Վարչապետ Կոբախիձեն ասել է, որ նախագահի ընտրությունները տեղի կունենան:
Ռուսաստանյան մամուլում տեսակետ է շրջանառվել, որ Զուրաբիշվիլին Փարիզում ոչ թե Վրաստանի, այլ իր համար է աջակցություն խնդրել: Բանն այն է, որ նա մտադիր չէ թողնել նախագահի պաշտոնը, եթե նույնիսկ խորհրդարանը նոր ընտրություններ անցկացնի: Այդ դեպքում նրա դեմ իշխանությունը յուրացնելու մեղադրանքով քրեական գործ կհարուցվի:
«Զուրաբիշվիլին հարկադրված կլինի ընտրություն կատարել փախուստի եւ կալանավորվելու միջեւ»,- գրում է «Նեզավիսիմայա գազետան»:
Սալոմե Զուրաբիշվիլին վրացի էմեգրանտների դուստր է, ծնվել է Ֆրանսիայում, ժամանակին պաշտոնավարել այդ երկրի արտաքին գործերի նախարարությունում: Նա Վրաստան է տեղափոխվել՝ պահպանելով Ֆրանսիայի քաղաքացիությունը: Ըստ երեւույթին, Փարիզում նա իր հետագա ճակատագրի հետ կապված հարց, այնուամենայնիվ, շոշափել է:
Ստեղծված իրավիճակում, երբ Վրաստանի եւ Եվրամիության միջեւ հարավերություննեը չափազանց բարդ են, իշխանությունները հազիվ թե Զուրաբիշվիլիի դեմ քրեական գործ հարուցեն: Ըստ երեւույթին, նա ինքն էլ պատրաստ չէ մինչեւ վերջ դիմակայության գնալ: Խնդիրը, սակայն, խորհրդարանական ընտրությունների շեմը հաղթահարած չորս քաղաքական ուժերն են: Նրանք չեն ընդունում «Վրացական երազանքի» իշխանությունը, նրա ձեւավորած կառավարությունը համարում են ոչ լեգիտիմ: Այդ կուսակցությունները չեն մասնակցում խորհրդարանի աշխատանքներին, իսկ «Վրացական երազանքը» հարյուր հիսուն մանդատից ստացել է միայն ութսունինը: Դա թույլ չի տալիս սահմանադրական փոփոխություններ կատարել, խախտվում է սահմանադրության պահանջը, որ խորհրդարանը պետք է լինի բազմակուսակցական: Իրավիճակն այնպիսին է, որ թեեւ ԱՄՆ-ը եւ Եվրամիությունը քննադատում են Վրաստանի գործող կառավարությանը, բայց նրա դեմ առարկայական քայլեր չեն ձեռնարկում:
Վարչապետ Կոբախիձեն ասել է, որ Թրամփի պաշտոնամուտից հետո ամեն ինչ կկարգավորվի: Հավանաբար, դա իրավիճակի սթափ գնահատական է: Նախագահ Զուրաբիշվիլին Փարիզից, երեւի, կվերադառնա այդ տրամադրվածությամբ: Սիրիական ճգնաժամի պայմաններում, ամենայն հավանականությամբ, ոչ ոք Վրաստանում լարվածությամբ շահագրգռված չէ:
Թիվ 1 սյունակ, Վահրամ Աթանեսյան
