Ուկրաինայի նախագահ Վլադիմիր Զելենսկին ցանկանում է վերջ դնել Ռուսաստանի հետ պատերազմին, հայտարարել է ԱՄՆ նորընտիր նախագահ Դոնալդ Թրամփը New York Post-ին տված հարցազրույցում։
«Նա ցանկանում է խաղաղություն հաստատել: Սա ինչ-որ նորություն է,- ասել է Թրամփը։- Նա հրադադար է ուզում։ Մենք մանրամասները չենք քննարկել։ Նա կարծում է, որ ժամանակը եկել է»:
Թրամփը վստահություն է հայտնել, որ Ռուսաստանի նախագահ Վլադիմիր Պուտինը ևս պետք է կարծի, որ «ժամանակը եկել է», որովհետև Ռուսաստանի նախագահը «պարտվել է. երբ կորցնում եք 700 հազար մարդու, ուրեմն ժամանակը եկել է»։ Դա չի ավարտվի, մինչև խաղաղություն չհաստատվի»:
ԱՄՆ նորընտիր նախագահի կարծիքով՝ Մոսկվան չկարողացավ հասնել իր նպատակներին, և «նրանք բոլորը խրված են այս սարսափելի պատերազմի մեջ, որը երբեք չպետք է տեղի ունենար»։
«Ես հայեցակարգ եմ մշակում, թե ինչպես վերջ դնել այս անհեթեթ պատերազմին»,- հավելել է Թրամփը։
Այսպես է քաղաքական գործիչը մեկնաբանել Զելենսկու հետ հանդիպումը, որը տեղի է ունեցել Փարիզում Ֆրանսիայի նախագահ Էմանուել Մակրոնի միջնորդությամբ։ Axios-ի տեղեկություններով՝ հանրապետականը ի սկզբանե չէր պլանավորել բանակցել Ուկրաինայի նախագահի հետ, սակայն նրան համոզել է Մակրոնը, և արդյունքում խոսակցությունը ստացվել է «լավ և արդյունավետ»։
