Թուրքիայի Իսպարտա նահանգում երկու ռազմական ուղղաթիռներ ուսումնա-վարժական թռիչքի ժամանակ բախվել են: UH 1 մոդելի ուղղաթիռներից մեկն, ըստ թուրքական աղբյուրների, կարողացել է վայրէջք կատարել, մյուսը խորտակվել է: Թուրքիայի պաշտպանության նախարարությունը նախապես հայտնել է չորս զինվորականի «մարտիրոսական մահվան» մասին:
Ըստ վերջին տեղեկությունների, զոհվել է վեց զինվորական: Անկարան պաշտոնապես հաստատել է, որ նրանց թվում է նաեւ Իսպարտայի ռազմա-օդային ուսումնարանի պետ գեներալ-մայոր Իսա Բայդիլին: Օդային աղետի պատճառների մասին ոչինչ հայտնի չէ:
Թուրքիայի ռազմական գերատեսչությունը տեղեկացրել է, որ «ծառայողական հետաքննությունն է սկսվել»:
Մինչ այդ Թուրքիայի պաշտպանության նախարարությունը ցավակցություն է հայտնել զոհվածների ընտանիքներին եւ զինված ուժերի ողջ անձնակազմին:
Ռազմական գերատեսչությունն այդ կերպ ընդգծել է պատահարի նշանակությունը: Այս ֆոնին Բաքվի «Թուրան» գործակալությունը փոխանցում է Ադրբեջանի պաշտպանության նախարար Զաքիր Հասանովի արձագանքը: Նա ցավակցություն է հայտնել թուրք պաշտոնակից Գյուլերին, կորուստի կապակցությամբ «խոր վիշտ» արտահայտել: «Ձեր վիշտը մեր վիշտն է»,- ասել է Ադրբեջանի ռազմական գերատեսչության ղեկավարը եւ բարձրյալին աղոթել «զոհված զինվորների» հագու հանգստության եւ նրանց ընտանիքներին զորակցություն հայտնել:
Զաքիր Հասանովը չէր կարող տեղյակ չլինել, որ ուղղաթիռների բախման հետեւանքով զոհվել է նաեւ Թուրքիայի ԶՈՒ բարձրաստիճան զինվորական՝ գեներալ-մայոր Իսա Բայդիլին: Նրա մասին հայտնի է, որ նախկինում եղել է մարտական օդաչու, բազմիցս անձամբ պատժիչ գործողություններ է իրականացրել քրդական զինված խմբավորումների դեմ:
Ադրբեջանի պաշտպանության նախարարը, մինչդեռ, բոլոր զոհերին անվանել է «զինվորներ»: Ընդ որում, տարիներ շարունակ ադրբեջանական բանակի մարդկային կորուստների համար Թուրքիան Ադրբեջանին ցավակցություն է հայտնել նախագահ Էրդողանի մակարդակով:
Եթե Բաքուն որոշել է Թուրքիային ցավակցություն հայտնել միայն պաշտպանության նախարարի մակարդակով, ապա դա վկայում է հարաբերությունների շատ որոշակի սառնության մասին:
Թիվ 1 սյունակ, Վահրամ Աթանեսյան
