Ուկրաինայի նախագահ Վլադիմիր Զելենսկին հայտարարել է, որ ուկրաինական բանակը չի կարող իր ուժերով վերադարձնել Ղրիմն ու Դոնբասը։ Այս մասին նա ասել է ֆրանսիական Le Parisien թերթին տված հարցազրույցում, որը հրապարակվել է երեկ։
Պարբերականը Զելենսկուն հարցրել է, թե ինչ փոխզիջումների է նա պատրաստ գնալ պատերազմին վերջ տալու համար։ «(Պատրա՞ստ եք) հանձնել Ղրիմը կամ Դոնբասը, գոնե ժամանակավորապես»,- հարցրել է թերթի լրագրողուհին։
Զելենսկին պատասխանել է. «Մենք չենք կարող հանձնել մեր տարածքները. Ուկրաինայի Սահմանադրությունը արգելում է մեզ դա անել։ Դե ֆակտո այդ տարածքներն այժմ վերահսկվում են ռուսների կողմից։ Մենք ուժ չունենք դրանք վերադարձնելու։ Մենք կարող ենք միայն հույս դնել միջազգային հանրության դիվանագիտական ճնշման վրա՝ Պուտինին ստիպելու նստել բանակցային սեղանի շուրջ»։
Զելենսկուն նաև հարցրել են՝ պատրա՞ստ է Վլադիմիր Պուտինի հետ բանակցությունների սեղանի շուրջ նստել։ «Կարևորը այն չէ, թե ով է նստած ձեր դիմաց: Կարևոր է, թե ինչ վիճակում ես գտնվում, երբ բանակցություն ես վարում: Չեմ կարծում, որ մենք գտնվում են թույլ դիրքերում ենք, բայց ուժեղ դիրքերում նույնպես չենք գտնվում: Կլինե՞նք ՆԱՏՕ-ում. մենք չգիտենք։ Կլինե՞նք արդյոք Եվրամիության մաս. այո, ապագայում, բայց ե՞րբ»,- նկատել է Ուկրաինայի նախագահը:
«Նման պայմաններում Պուտինի հետ նստել բանակցությունների սեղանի շուրջ կնշանակի նրան իրավունք տալ ամեն ինչ որոշելու երկրի մեր հատվածում։ Սկզբում մենք պետք է մշակենք մոդել, գործողությունների ծրագիր կամ խաղաղության ծրագիր՝ ինչպես ուզում եք անվանեք այն: Այդ ժամանակ դա կարող ենք ներկայացնել Պուտինին, ավելի լայն իմաստով՝ ռուսներին»,- ասել է նա։
Զելենսկին ընդգծել է, որ համաշխարհային ոչ մի առաջնորդ «իրավունք չունի բանակցություններ վարելու Պուտինի հետ առանց Ուկրաինայի»։ «Մենք այդ մանդատը ոչ մեկին չենք պատվիրակել։ Մենք ենք զոհը»,- հայտարարել է Զելենսկին։
