ԱՄՆ-ն մինչև տարեվերջ 1,22 մլրդ դոլար կհատկացնի Ուկրաինային

ԱՄՆ նախագահ Ջո Բայդենի վարչակազմը մինչև տարեվերջ ավելի քան մեկ միլիարդ դոլար կհատկացնի Ուկրաինային ռազմական օգնություն ցուցաբերելու համար: Այդ մասին հայտնել է Defense One պարբերականը՝ վկայակոչելով անանուն ամերիկացի պաշտոնյայի խոսքերը:

«Վարչակազմը մտադիր է մինչև տարեվերջ օգտագործել «Ուկրաինայի անվտանգության աջակցության նախաձեռնության» շրջանակներում մնացած 1,22 միլիարդը»,-ասվում է հրապարակման մեջ:

Նշվում է, որ մինչև տարեվերջ սպասվում է Կիևին ռազմական օգնություն տրամադրելու ևս մեկ դիմում:

Այդ նպատակների համար Վաշինգտոնի ընդհանուր ծախսերը, պարբերականի տվյալներով, գերազանցել են 59 մլրդ դոլարը։

Պաշտոնյայի խոսքով՝ Պենտագոնն ունի ևս 5,6 միլիարդ դոլարի զենք և սարքավորումներ, որոնք կարող են փոխանցվել Ուկրաինային, բայց այդ միջոցների գոնե մի մասը կանցնի հաջորդ վարչակազմին։