Դեկտեմբերի 21-ին ժամը 07-ից մինչեւ 09-ը Թաթարստանի մայրաքաղաք Կազանը երեք անգամ երեք ուղղություններից ենթարկվել է «ինքնաթիռի տիպի անօդաչու թռչող սարքերի հարձակման»:
Ինքնավար հանրապետության ղեկավարի աշխատակազմից մամուլին հայտնել են, որ ԱԹՍ-երից մեկը հարվածել է «արդյունաբերական ձեռնարկության, մեկը՝ ընկել գետը, վեցը՝ խոցել բնակելի տարածքներ»: Այլ աղբյուրներ հայտնում են, որ Կազանում «իրականացվում է բնակչության մասնակի վերատեղավորում»:
Որքանով հասկացվում է, խոսքը ռազմական արդյունաբերության ձեռնարկություններին մոտ գտնվող հատվածներից քաղաքացիական բնակչության տարհանման մասին է: «Ռուսավիացիան» հայտարարել է Կազանի եւ Իժեւսկի օդանավակայանների ժամանակավոր փակման մասին: Իժեւսկի դեմ ԱԹՍ-երի հարձակման մասին տեղեկություն չկա:
Ուդմուրտիայի մայրաքաղաքը, սակայն, Կազանից ուղիղ գծով ոչ ավելի, քան 270 կիլոմետր հեռավորության վրա է: Բաց աղբյուրների տեղեկություններով՝ Իժեւսկում ռազմա-արդյունաբերական համալիրի տասնյակ խոշոր ձեռնարկություններ կան:
«Պատերազմի ուսումնասիրության ինստիտուտի» տեղեկացվածությամբ՝ անցյալ շաբաթ ուկրաինական կողմն առաջին անգամ ռազմաճակատի մի հատվածում «ռոբոտ-գնդացրորդներ եւ ականազերծման հեռակարավարվող սարքավորումներ է կիրառել, որ նախագծվել եւ արտադրվել են Ուկրաինայում»:
Ճիշտ է, դա «փորձնական բնույթի մարտ էր»: Ուկրաինական բանակի մի շարքային զինվոր ասել է, որ «ռուսները խուճապի են մատնվել»: Տեխնիկական այդ նորարարությունը որքանո՞վ կիրառելի կլինի՝ «Պատերազմի ուսումնասիրության ինստիտուտի» փորձագետները դժվարանում են կանխատեսել:
Ուշադրության արժանի է նաեւ այն, որ Կազանը գրոհել են «ինքնաթիռի տիպի անօդաչու թռչող սարքավորումներ»: Ըստ տեղեկությունների, դա նույնպես նորարություն է. ուկրաինացի ինժեներներին հաջողվել է խորհրդային ժամանակներից մնացած միաշարժիչ ինքնաթիռները վերածել ԱԹՍ-երի, որ ունակ են կրելու մինչեւ հինգ հարյուր կիլոգրամ պայթուցիկ:
Ռուսաստանի ռազմա-արդյունաբերական համալիրի համեմատ, իհարկե, ուկրաինական նորարարությունները ներշնչող չեն: Բայց բավական տպավորիչ է, որ Կազանը գրոհի է ենթարկվել ՌԴ նախագահ Վլադիմիր Պուտինի ավելի քան չորս ժամ տեւած մամուլի ասուլիսից հետո, որի ընթացքում նա ԱՄՆ-ին, ՆԱՏՕ-ին առաջարկել է «հրթիռային մենամարտ» կազմակերպել:
Վլադիմիր Պուտինը պնդել է, որ եթե Ռուսաստանը Կիեւում խոցման թիրախ ընտրի եւ «Օրեշնիկ» կիրառի, ապա արեւմտյան ոչ մի ՀՕՊ եւ հակահրթիռային պաշտպանության համակարգ այն խոցել չի կարող: Գուցե իրականում այդպես էլ կա: Բայց դեկտեմբերի 21-ին ուկրաինական ութ ինքնաթիռի տիպի ԱԹՍ հաղթահարել է ՌԴ ՀՕՊ եւ հակահրթիռային պաշտպանությունը եւ հասել Կազան:
Իսկ դա նշանակում է, որ Ռուսաստանի ՀՕՊ եւ հակահրթիռային պաշտպանության համակարգը չափազանց խոցելի է, եթե, մանավանդ, հաշվի առնենք, որ ինքնաթիռի տիպի ուկրաինական ԱԹՍ-երը մինչեւ Թաթարստանի մայրաքաղաքում թիրախին հասնելն ՌԴ օդային տարածքում մոտ հազար կիլոմետր թռիչք են իրականացրել:
Անցյալ տարի Ուկրաինայի Զինված ուժերի հրամանատար Զալյուժնին, պաշտոնը թողնելուց կարճ ժամանակ առաջ, տեսակետ է հայտնել, որ ուկրաինական պատերազմը հասել է մի կետի, երբ որոշիչը կլինի կողմերի տեխնոլոգիական մակարդակը: «Օրեշնիկ» հրթիռի փորձարկմամբ Վլադիմիր Պուտինը փորձել է Արեւմուտքին վախեր ներշնչել: Ի՞նչ ունի իր զինանոցում ՆԱՏՕ-ն՝ հայտնի չէ: Բայց Ուկրաինան հայտնում է սեփական բալիստիկ հրթիռների արտադրության մասին: Եկող օգոստոսին կգործարկվի «Բայրաքտար» ԱԹՍ-երի արտադրությունը, որն իրականացնում է Թուրքիան:
Ռուս-ուկրաինական պատերազմն, իրոք, կարող է վերաճել գլոբալ աղետի: ԱՄՆ ընտրված նախագահ Թրամփն այն անվանել է «հիմարություն, որ անհապաղ պիտի կանգնեցնել»: Մեկ ամիս հետո Թրամփը կստանձնի պաշտոնը: Կհաջողվի՞ նրան կողմերին բերել բանակցությունների սեղանի շուրջ:
Թիվ 1 սյունակ, Վահրամ Աթանեսյան
