Քաթարը կդադարեցնի գազ մատակարարել ԵՄ-ին, եթե անդամ երկրները խստորեն գործադրեն հարկադիր աշխատանքի և շրջակա միջավայրի վնասի մասին նոր օրենքը, հայտարարել է երկրի էներգետիկայի նախարար Սաադ ալ-Քաաբին Financial Times-ին տված հարցազրույցում։
«Կայուն զարգացման ոլորտում համալիր ստուգում անցկացնելու մասին դիրեկտիվը, որը հաստատվել է այս տարի, պահանջում է, որ Եվրամիությունում գործող խոշոր ընկերություններում ստուգումներ անցկացվեն, թե արդյոք դրանց մատակարարման շղթաներում հարկադիր աշխատանք է օգտագործում կամ վնաս է հասցվում շրջակա միջավայրին, և եթե այդպես է, միջոցներ ձեռնարկվեն: Պատժամիջոցները ներառում են համաշխարհային շրջանառության մինչև 5%-ի չափով տուգանքներ։
«Եթե Եվրոպա գնալով ես կկորցնեմ իմ եկամտի 5%-ը, ապա ես Եվրոպա չեմ գնա: Ես չեմ կատակում»,- ասել է Քաաբին՝ հավելելով, որ «QatarEnergy-ի եկամտի 5%-ը նշանակում է Քաթարի եկամտի 5%-ը։ Դա մարդկանց փողն է, ուստի ես չեմ կարող կորցնել նման գումար, և ոչ ոք չի համաձայնի կորցնել այդպիսի փողը»:
Քաաբին, որը նաև պետական սեփականություն հանդիսացող Qatar Energy-ի գործադիր տնօրենն է, ասել է, որ ԵՄ-ն պետք է մանրամասն վերանայի ստուգման մասին օրենքը:
Նա նաև ասել է, որ իր երկիրը մտահոգված չէ ԱՄՆ նորընտիր նախագահ Դոնալդ Թրամփի՝ հեղուկ բնական գազի արտահանման սահմանափակումները վերացնելու խոստումով:
Քաթարը, որը հեղուկ բնական գազի աշխարհի խոշորագույն արտահանողներից է, ձգտում է ավելի ակտիվ դեր խաղալ Ասիայում և Եվրոպայում, քանի որ աճում է մրցակցությունը դրա ամենամեծ մատակարարի՝ Միացյալ Նահանգների կողմից: Քաթարը նախատեսում է մինչև 2027 թվականը գազի հեղուկացման իր հզորությունը տարեկան 77 միլիոն տոննայից հասցնել 142 միլիոնի։
