Տուրքերի ավելացումը միայն այս տարի 24 մլրդ դրամ է ապահովել. Ավինյան

«2023թ. դեկտեմբերին, երբ մենք քննարկեցինք 2024թ. համար նախատեսվող տուրքերը, այդ ժամանակ նույնպես որոշակի քննադատություն հնչեց կառուցապատման ոլորտի շինթույլտվությունների տուրքերի ավելացման մասով։ Ուզում եմ ասել, որ այդ տուրքերի ավելացումը միայն այս տարի Երևան քաղաքի բյուջե մոտավորապես 24 մլրդ դրամ մուտք է ապահովել»,- այս մասին այսօր Երևանի ավագանու նիստում հայտարարեց քաղաքապետ Տիգրան Ավինյանը՝ պատասխանելով Հայկ Գրիգորյանի հարցին, թե ինչ է արվում, որպեսզի զսպվի «վայրի» կառուցապատումը։

Քաղաքապետը նկատեց, որ նմանատիպ տուրքերը ամենաուժեղ զսպող գործիքն են վայրի կառուցապատման դեմ։

Տիգրան Ավինյանը նշեց, որ նոր նախագծում հավելյալ, ավելի մեծ գումարների տուրքեր են նախատեսել այն դեպքերում, երբ կառուցապատողը արդեն իսկ նախատեսված ծավալներից շեղվում է։