Ասադը չկարողացավ «գլուխ հանել» Սիրիայում սոցիալական խնդիրներից: Այս մասին ՌԴ ԱԳ նախարար Սերգեյ Լավրովը ասել է ՏԱՍՍ-ին տված հարցազրույցում` Սիրիայում իրավիճակի արագ զարգացումը բացատրելով նախկին նախագահ Բաշար Ասադի՝ երկրում սոցիալական խնդիրները հաղթահարելու անկարողությամբ, որոնցում ավերիչ մեծ դեր խաղացին Միացյալ Նահանգների քայլերը։
«Արդեն հիմա կարող ենք ասել, որ իրավիճակի դեգրադացիայի պատճառներից մեկն այն էր, որ նախկին ղեկավարությունը տևական քաղաքացիական հակամարտության համատեքստում չկարողացավ բավարարել բնակչության հիմնական կարիքները»,- ասել է Լավրովը։
«Ռուսական օդատիեզերական ուժերի մասնակցությամբ միջազգային ահաբեկչության դեմ պայքարում համոզիչ հաջողություններից հետո սիրիացիների հույսերը, որ իրենց կյանքը դեպի լավը կփոխվի, չարդարացան»,- նշել է Լավրովը։
Ռուսաստանը, ըստ Լավրովի, տարբեր օգնություն է ցուցաբերել բարեկամ սիրիացի ժողովրդին, այդ թվում՝ մարդասիրական օգնության մատակարարման, հակամարտության ընթացքում ավերված սոցիալական ենթակառուցվածքի վերականգնման, սիրիացի փախստականների և ժամանակավոր տեղահանվածների վերադարձի համար նյութական բազա ստեղծելու միջոցով. «Սակայն, կարելի է փաստել, որ նախորդ իշխանությունները, չնայած մեր հրատապ առաջարկություններին և ակտիվ աջակցությանը, չկարողացան կառուցողական երկխոսություն հաստատել ընդդիմախոսների և տարածաշրջանային ազդեցիկ հարևանների հետ»,- ընդգծել է Լավրովը։
