«Առաջին անգամ գիտնականը դատվում է իր գիտական արդյունքների համար». Մեղադրող կողմը յոթ տարի ազատազրկում է խնդրել Նովոսիբիրսկից ֆիզիկոսին՝ բյուջեի գումարների յուրացման գործով.
Դատախազությունը պահանջել է խարդախության գործով յոթ տարվա ազատազրկման դատապարտել ֆիզիկամաթեմատիկական գիտությունների դոկտոր, ՌԴ ԳԱ Սիբիրի մասնաճյուղի ջերմաֆիզիկայի ինստիտուտի լաբորատորիայի ղեկավար Օլեգ Կաբովին։ Այս մասին գրում է T-Invariant-ը։
Ըստ «Կոմերսանտ»-ի՝ Կաբովի լաբորատորիան նպատակ ուներ ստեղծել ջերմային լարվածության տարրերի հովացման համակարգի փորձարարական մոդել: Իր աշխատանքի ընթացքում 69-ամյա ֆիզիկոսը, ըստ քննիչների, կեղծել է գիտական հաշվետվությունները, այդ թվում՝ նախկինում ձեռք բերված արդյունքները, հափշտակել բյուջեի գումարի մի մասը։ Վնասը, իբր, կազմել է ավելի քան յոթ միլիոն ռուբլի։
«Լաբորատորիայի աշխատանքը ուղղված չէր նոր գիտելիքների ձեռքբերմանը, հիմնական նպատակը լաբորատորիայի համար դրական համբավ ստեղծելն էր՝ հնարավորինս շատ նոր դրամաշնորհներ, սուբսիդիաներ և համաֆինանսավորում ստանալու համար», – ասաց դատախազության ներկայացուցիչը դատարանում։
Կաբովը հերքում է իր մեղքը. Նրա կինը՝ Ելենա Բիկովսկայան, մեղադրանքներն անվանել է «հարձակում ռուսական գիտության դեմ»։ Նրա խոսքով՝ գիտնականն առաջարկել է ցույց տալ իր աշխատանքի արդյունքները, սակայն դատարանը հրաժարվել է դա հաշվի առնել որպես նրա անմեղության ապացույց։
T-Invariant-ը պնդում է, որ «սա ժամանակակից Ռուսաստանում առաջին քրեական գործն է, որում գիտնականին մեղադրանք է առաջադրվել ոչ բավարար հետազոտությունների համար»:
