Հունվարի 29-ին Անկարայում տեղի կունենա Թուրքիայի, Ադրբեջանի և Ուզբեկստանի արտաքին գործերի, առևտրի և տրանսպորտի նախարարների երկրորդ եռակողմ հանդիպումը: Հանդիպումը նվիրված կլինի երեք առանցքային թեմաների՝ արտաքին քաղաքական համագործակցությանը, առևտրատնտեսական կապերի զարգացմանը և տարածաշրջանային տրանսպորտային ցանցերի կատարելագործմանը:
Հանդիպման արդյունքում նախատեսվում է ստորագրել Անկարայի հռչակագիրը և գործողությունների ծրագիրը, որը սահմանում է երեք երկրների համագործակցության կոնկրետ «ճանապարհային քարտեզը»:
Իր ելույթում նախարար Ֆիդանը նախատեսում է ընդգծել գլոբալ անկայունության շրջանում տարածաշրջանի աճող աշխարհաքաղաքական նշանակությունը և թյուրքական աշխարհում ինտեգրման խորացման անհրաժեշտությունը: Հատուկ ուշադրություն կդարձվի այն հնարավորություններին, որոնք բացվել են «միջին միջանցքի» համար՝ վերջին հինգ տարիների ընթացքում Ասիայի և Եվրոպայի միջև մատակարարման ավանդական շղթաների խաթարումից հետո:
