Հաջորդ տարի Չինաստանը Լուսին կուղարկի նոր զոնդ, որը կարող է մեկ ցատկով անցնել տասնյակ կիլոմետրեր, այն ջուր կփնտրի Երկրի արբանյակի հարավային բևեռում, երկուշաբթի հաղորդել է Չինաստանի Կենտրոնական հեռուստատեսությունը:
«Chang’e-7 հետազոտական զոնդը բաղկացած է չորս սարքից՝ ուղեծրային և վայրէջքի մոդուլից, լուսնագնացից և ցատկող զոնդից, որոնք հագեցած կլինեն ջրի մոլեկուլային անալիզատորով:
«Ցատկող» զոնդը կկատարի առնվազն 3 թռիչք, մինչդեռ ավանդական զոնդերը մեկ անգամ են վայրէջք կատարում»,- ասել է Chang’e-7 առաքելության գլխավոր կոնստրուկտորի տեղակալ Թան Յուխուան։
Chang’e-7 տիեզերական զոնդը Լուսնի հարավային բևեռում սառույց է որոնելու։ Եթե այն գտնվի, դա կնվազեցնի Լուսին ջուր հասցնելու ծախսերն ու ժամանակը, ինչը կօգնի լուսնային բազա կառուցել, ինչպես նաև կօգնի ուսումնասիրել Լուսնի և այլ մոլորակների վրա կյանքի հավանականությունը:
«Զոնդը կարող է հուսալիորեն և բազմիցս վայրէջք կատարել տարբեր մակերեսների վրա, դա նման է նրան, թե ինչպես է մարդը բարձրությունից ցատկելիս ծալում ոտքերը», – ավելացրել է Թան Յուխուան:
Նշվում է, որ վեցոտանի այս զոնդը կունենա սողալու, ցատկելու, ինչպես նաև հրթիռային շարժիչի միջոցով թռչելու հնարավորություն, ինչի շնորհիվ մեկ ցատկով կկարողանա անցնել տասնյակ կիլոմետրեր։ Դա թույլ կտա նրան ուսումնասիրել կոշտ տեղանքը և խորը խառնարանները, որոնք անհասանելի են սովորական լուսնագնացների համար:
