Ուկրաինայի նախագահ Վլադիմիր Զելենսկին չի բացառում, որ միջուկային զենքը կարող է երաշխավորել երկրի անվտանգությունը, եթե Կիևն այդպես էլ չդառնա ՆԱՏՕ-ի անդամ: Այս մասին նա հայտարարել Է բրիտանացի լրագրող Պիրս Մորգանին տված հարցազրույցում։
Զելենսկին խոստովանել է, որ Ուկրաինայի անդամակցությունը ՆԱՏՕ-ին կարող է ձգձգվել տարիներ կամ տասնամյակներ: Նախագահը հռետորական հարց է տվել.
«Ի՞նչը կպաշտպանի մեզ այս չարիքից: Ո՞րն է աջակցության այն փաթեթը: Մեզ միջուկային զենք կտա՞ն։ Հետո թող տան։ Արդյոք նրանք մեզ այնպիսի քանակի հրթիռներ կտան, որ մենք կարողանանք կանգնեցնել Ռուսաստանին։ Ես դրանում վստահ չեմ, բայց կարծում եմ, որ դա կօգնի: Հակառակ դեպքում, ո՞ր հրթիռները կարող են կանգնեցնել Ռուսաստանի միջուկային հրթիռները: Սա հռետորական հարց է։ Վերադարձրե՛ք մեզ միջուկային զենքը, տվե՛ք մեզ հրթիռային համակարգեր, գործընկերները կօգնեն մեզ ֆինանսավորել միլիոնանոց բանակը, ձեր զորակազմը տեղափոխեք մեր երկրի այն շրջաններ, որտեղ մենք կայունություն ենք ուզում, որպեսզի մարդիկ հանգիստ լինեն»,- ասել է նա։
Նշենք, որ Ուկրաինան միջուկային զենքից հրաժարվել է 1994թ․՝ Բուդապեշտի հուշագրի շրջանակներում։ Դրա դիմաց Ռուսաստանը, ԱՄՆ-ն և Մեծ Բրիտանիան երաշխավորում էին նրա տարածքային ամբողջականությունը։
