Ըստ վերջին 10 ամիսների ցուցանիշների՝ Հայաստանի և Իրանի միջև 231,293 քաղաքացու փոխայց է կատարվել: Այդ թվից 66,593-ը Իրանի քաղաքացի է Հայաստան այցելել, իսկ 164,700-ը ՀՀ քաղաքացի է սահմանը հատել: Այդ մասին ասուլիսի ժամանակ ասաց Հայաստանում Իրանի դեսպան Մեհդի Սոբհանին:
«Եթե հանրագումարով ներկայացնեմ այս թիվը, որոնք հատել են սահմանը և հետ են վերադարձել, ընդհանուր թիվը 456,502 է: Այսինքն՝ 10 ամսվա կտրվածքով մենք մոտավորապես կես միլիոն սահմանային երթևեկություն ենք ունեցել: Սա մեծ թիվ է ընդամենը 10 ամսվա կտրվածքով:
Այս 10 ամսվա ընթացքում բեռնատար ավտոմեքենաների հոսքը 126,890 է եղել: Սա միայն բեռնատար ավտոմեքենաների թիվն է, նաև ավտոբուսներ են երթևեկում, քաղաքացիներն իրենց փոխադրամիջոցներով են երթևեկում:
Այս պահին մեր ապրանքաշրջանառությունը երկու երկրների միջև 755 մլն դոլար է: Առաջին քայլով մենք ցանկանում ենք հասցնել այս թիվը 1 միլիարդի շեմին, հաջորդ քայլով շեմը բարձրացնենք, հասցնենք 3 միլիարդի: Այդ պահին ԵԱՏՄ դիտորդ անդամ ենք. սա կնպաստի, որ մեր առևտուրն ավելի զարգանա:
Թվային ցուցանիշներին նայելով՝ կարծում եմ՝ կհամաձայնեք ինձ հետ, որ երկրորդ կամրջի կառուցումը անհրաժեշտություն է: Ե՛վ մենք ենք կողմ այդ նախագծին, և՛ Հայաստանի կառավարությունը: Հիմա այդ ուղղությամբ քննարկումներ են տեղի ունենում, նախագծային աշխատանքները կատարվել են: Հուսով եմ, որ մենք արդեն վերջնական պայմանավորվածություն ձեռք կբերենք, և շինարարական աշխատանքները կմեկնարկեն»,- ասաց դեսպանը՝ հավելելով, որ այլ ելք չկա՝ Հայաստանի և Իրանի հարաբերությունները զարգացնելուց ու ամրապնդելուց բացի:
