Մոսկվան և՛ հրապարակավ, և՛ հայ բարեկամների հետ երկխոսության ընթացքում Երևանի համար հստակ նշել է Եվրասիական տնտեսական միությանը և Եվրամիությանը միաժամանակյա անդամակցության անհնարինությունը․ «Իզվեստիա»- ին տված հարցազրույցում ասել է ՌԴ փոխարտգործնախարար Միխայիլ Գալուզինը:
«Մաքսային ստանդարտների, տեխնիկական, սանիտարական և բուսասանիտարական ստանդարտների, ապրանքների մակնշման և սերտիֆիկացման և նույնիսկ մտավոր սեփականության հարցերի վերաբերյալ տարբեր մոտեցումներով երկու անհամատեղելի կարգավորիչ համակարգեր կան։ Դրանք բոլորովին տարբեր համակարգեր են, և դրանցում միաժամանակ գտնվելն ուղղակի անհնար է», – ընդգծել է Գալուզինը։
Նա հավելել է, որ ԵԱՏՄ-ին անդամակցությունը Հայաստանին «զգալի և ծանրակշիռ երկարաժամկետ օգուտներ է բերում առևտրի աճի և ներդրումների աճի տեսքով»։
Ըստ փոխնախարարի՝ ԵՄ-ը վիզայի ազատականացման ռեժիմի դիմաց Հայաստանից պահանջում է քաղաքական լոյալություն և միացում հակառուսական պատժամիջոցներին։
«Եվ այս ամենը տեղի է ունենում այն ֆոնին, որ Հայաստանի անդամակցությունը Եվրասիական տնտեսական միությանը զգալի և ծանրակշիռ երկարաժամկետ օգուտներ է բերում երկրին»,- ասել է նա։
