Ելիսեյան պալատում տեղի է ունեցել Հայաստանի վարչապետ Նիկոլ Փաշինյանի հանդիպումը Ֆրանսիայի նախագահ Էմանուել Մակրոնի հետ։ Ֆրանսիական կողմի տարածած հաղորդագրությունիւց տեղեկանում ենք, որ Ֆրանսիան կաջակցի Հայաստանին կենսաբազմազանության վերաբերյալ COP 17-ի համաժողովի նախապատրաստական աշխատանքների համար։
«Հանրապետության նախագահը և Հայաստանի վարչապետը եզրափակել են՝ քննարկելով կենսաբազմազանության վերաբերյալ COP17-ի նախապատրաստական աշխատանքները, որը Հայաստանը կհյուրընկալի 2026 թվականին։ Երկրի ղեկավարը նշել է, որ Ֆրանսիան լիովին պատրաստ է անհրաժեշտ աջակցություն ցուցաբերել Հայաստանին՝ նախապատրաստվելու COP17-ին»,- ասվում է Ելիսեյան պալատի տարածած հաղորդագրության մեջ։
Մակրոնը նաև շնորհակալություն է հայտնել վարչապետ Փաշինյանին մասնակցության համար՝ ընդգծելով Հայաստանի և ԵՄ-ի տեսակետների համընկնումը նորարարության և նոր տեխնոլոգիաների վերաբերյալ։
Ֆրանսիայի առաջնորդը հաստատել է Ֆրանսիայի լիակատար աջակցությունը Հայաստանի և Ադրբեջանի հարաբերությունների կարգավորմանը, ինչպես նաև միջազգային իրավունքին համապատասխան խաղաղության պայմանագրի ստորագրմանը։ Նա նաև վերահաստատել է Ֆրանսիայի վճռականությունը՝ աջակցելու Հայաստանի տարածքային ամբողջականությանը և ինքնիշխանությանը, ինչպես նաև հայ ժողովրդի՝ խաղաղության, անվտանգության և ժողովրդավարության ձգտումներին։
