Դոնալդ Թրամփը կրկին պնդել է իր ծրագիրը, ըստ որի՝ Միացյալ Նահանգները պետք է պատասխանատվություն ստանձնի Գազայի հատվածի համար և այնտեղ բնակվող 2,1 միլիոն պաղեստինցիներին տեղափոխի հարևան երկրներ։ Այս մասին ԱՄՆ նախագահը հայտարարել է Մերձավոր Արևելքում Ամերիկայի մերձավոր դաշնակիցներից մեկի՝ Հորդանանի թագավոր Աբդալլահ Երկրորդի հետ հանդիպման ժամանակ:
«Մենք կվերցնենք Գազան։ Մենք ոչինչ գնելու կարիք չունենք։ Գնելու բան չկա։ Մենք պատրաստվում ենք վերցնել, պահել, փայփայել այն: Գազան կարող է դառնալ ադամանդ: Մենք, ի վերջո, հասնելու ենք դրան, իսկ Մերձավոր Արևելքում շատ աշխատատեղեր կստեղծվեն մարդկանց համար. դա արվելու է Մերձավոր Արևելքի բնակիչների համար», – հավելել է նա։
Հիշեցնենք՝ ԱՄՆ նախագահը արաբական երկրներին՝ Հորդանանին, Եգիպտոսին և Սաուդյան Արաբիային, առաջարկել է Գազայի հատվածի պաղեստինցիներին ընդունել իրենց մոտ և դրա դիմաց խոստացել ԱՄՆ-ի աջակցությունը, սակայն պետությունները կտրականապես մերժել են Թրամփի առաջարկը։
