Քաղաքական մակարդակում Հայաստան-ԵՄ երկխոսությունը շատ ավելի առաջ է գնացել, քան մեր տնտեսական հարաբերություններն են: Որոշակի ճեղքվածք է առաջացել այս երկուսի միջև:
Այս մասին Հանրային ՀԸ եթերում ասաց ՀՀ ԱԺ եվրաինտեգրման հարցերի մշտական հանձնաժողովի նախագահ Արման Եղոյանը՝ անդրադառնալով ԵՄ-ին ՀՀ-ի անդամակցման գործընթացի մեկնարկին:
«Անհրաժեշտություն կա մեր տնտեսական հարաբերությունները բերել, հասցնել, մոտեցնել առնվազն այս քաղաքական երկխոսության մակարդակին»,- ասաց Արման Եղոյանը:
Ինչ կփոխվի հիմա մեր կյանքում՝ հարցին ի պատասխան, Եղոյանն ասաց՝ կարճ րոպեների ընթացքում թվարկել չի կարող, սակայն կնշի գլխավորը:
«Կփոխվի մեր տնտեսության կառուցվածքը, մեր արտադրանքի որակը, արտադրողականության ծավալները: Սրանք այն ոլորտներն են, որոնք ընդգրկված են ազատ առևտրի համաձայնագրում և որոնց միջոցով ԵՄ-ն պետություններին պատրաստում է անդամության»,- ասաց Արման Եղոյանը:
Ըստ ԱԺ եվրաինտեգրման հարցերի մշտական հանձնաժողովի նախագահի, մեկ պետությունը չի կարող լինել 2 մաքսային միության անդամ: Անդրադառնալով այս մասով Ռուսաստանի փոխվարչապետ Ալեքսեյ Օվերչուկ հայտարարություններին, Եղոյանը նկատեց.
«Դա Օվերչուկը չի ասում, դա տրամաբանությունն է ասում: Եկեք Ռուսաստան և ԵԱՏՄ բառերը չօգտագործենք որպես հոմանիշներ, ինչպես որ չենք կարող օգտագործել Ֆրանսիա և ԵՄ, Գերմանիա և ԵՄ բառերը որպես հոմանիշներ»,- ասաց Եղոյանը:
