ԱՄՆ-ի փոխնախագահ Ջեյ Դի Վենսը իր X սոցիալական ցանցի էջում հերքել է իրեն վերագրվող սպառնալիքը՝ ամերիկյան զորքեր ուղարկելու Ուկրաինա: Այսպես նա արձագանքել է The Wall Street Journal-ի (ինչպես նաև այլ միջազգային լրատվամիջոցների) կողմից իր հարցազրույցի մեկնաբանությանը։
«Նախագահ Թրամփը լավագույն բանակցողն է, և նա խաղաղություն կբերի տարածաշրջանին՝ վերջ դնելով Ուկրաինայի պատերազմին։ Եվ ինչպես մենք միշտ ասել ենք, ամերիկյան զորքերը չպետք է վտանգվեն, երբ դա չի նպաստում Ամերիկայի շահերին և անվտանգությանը։ Սա պատերազմ է Ռուսաստանի և Ուկրաինայի միջև», — գրել է Վենսը։
Վենսի հարցազրույցը հրապարակվել է «Վենսը սպառնում է պատժամիջոցներով և ռազմական ուժով՝ ստիպելու Պուտինին համաձայնության գալ Ուկրաինայի հարցում» վերնագրով։ Հարցազրույցի ընթացքում նա նշել է. «Գոյություն ունեն տնտեսական ազդեցության գործիքներ, ինչպես նաև, իհարկե, ռազմական ազդեցության գործիքներ»։
WSJ-ի թղթակցի ճշգրտող հարցին, թե արդյոք ամերիկյան զորքերի Ուկրաինայում տեղակայման տարբերակը լիովին հանված է օրակարգից, Վենսը պատասխանել է. «Նախագահը (Թրամփը) շատ հստակ ասում է. երբ նա սկսում է բանակցությունները, օրակարգում բոլոր տարբերակները քննարկման առարկա են»։
Հարցազրույցի հրապարակումից մեկ օր առաջ Պենտագոնի ղեկավար Փիթ Հեգսեթը բացառել էր ամերիկյան զորքերի տեղակայումը Ուկրաինայում։ Նա նաև նշել էր, որ 2014 թվականի սահմաններին վերադառնալը «անիրականանալի խնդիր» է։
