Միլանի «Ինտերի» փորձառու կիսապաշտպան Հենրիխ Մխիթարյանը լրագրողների հետ զրույցում խոսել է Թուրինի «Յուվենտուսից» կրած պարտության մասին։ Մխիթարյանը Football Italia-ին ասել է, որ միլանյան ակումբն առաջին խաղակեսում չկարողացավ օգտագործել մեծ թվով հնարավորություններ:
Հայ ֆուտբոլիստը նշել է, որ ընդմիջումից հետո «Ինտերը» չխաղաց իր լավագույն մարզավիճակով, թեեւ շատ էներգիա ծախսեց։ «Այս պարտությունից հետո մրցաշրջանի մեր նպատակները չեն փոխվել: Մենք միշտ պայքարում ենք գավաթների համար։ Եթե մեկ հանդիպում չկարողացանք հաղթել, դա չի նշանակում, որ դադարել ենք ֆավորիտ լինելուց»,- նշել է Մխիթարյանը։
«Մենք թույլ տվեցինք սխալներ, որոնք պետք է չլինեին։ Ֆուտբոլն այսպիսին է․ երբ չես օգտագործում պահերդ, ստիպված ես թանկ վճարել։ Իմանալով մեր ուժը՝ երբեմն մենք կորցնում ենք զգոնությունը։ Մենք դժգոհ ենք այս արդյունքից»,– հավելել է նա։
«Ինտերը» 54 միավորով երկրորդն է եւ առաջատար «Նապոլիից» հետ է 2 միավոր։ «Յուվենտուսը» չորրորդն է՝ 46 միավոր։
