ՀՀ–ում ՏՏ ընկերությունների աշխատակիցների թիվը 2024 թվականին նվազել է մոտ 2 հազարով։ Այս մասին կազմակերպության տարեկան ժողովի ժամանակ հայտարարել է ՀՀ Առաջատար տեխնոլոգիաների ձեռնարկությունների միության (UATE) գործադիր տնօրեն Սարգիս Կարապետյանը։
ՀՀ վիճակագրական կոմիտեի տվյալներով՝ 2024 թվականի վերջի դրությամբ ՏՏ և հեռահաղորդակցության ոլորտներում աշխատել է շուրջ 45,6 հազար մարդ։
Նրա խոսքով նվազել է նաև ընկերությունների թիվը՝ 11–հազարից հասնելով 6 հազարի։
Հիմնականում դա պայմանավորված է դոլարի նկատմամբ դրամի փոխարժեքի աճով՝ 2022 թվականին մոտ 20 տոկոսով։ Դրա պատճառով տեղական ընկերությունների աշխատանքի ինքնարժեքը դոլարային արտահայտությամբ աճել է, և, հետևաբար, նրանք ավելի քիչ մրցունակ են դարձել գնային առումով:
Սրա պատճառով շատ ընկերություններ, որոնք նախկինում աշխատում էին 15-20% շահույթով, այժմ նվազագույն շահույթ ունեն։
Կարապետյանի խոսքով՝ սա անկման միակ պատճառը չէ, կա մեկ այլ պատճառ՝ ծրագրավորման մեջ արհեստական բանականության և լեզուների խոշոր մոդելների (LLM) աճող կիրառությունը։ Դրանց պատճառով ԱՄՆ-ում ՏՏ ոլորտում նոր թափուր աշխատատեղերի թիվը 2022 թվականի համեմատ նվազել է մոտ 70%-ով։ Կարապետյանը նշել է, որ դա չի կարող չազդել իրենց գործընկեր ընկերությունների վիճակի վրա, այդ թվում՝ Հայաստանում։
Նշենք, որ վիճակագրության համաձայն՝ Հայաստանում ՏՏ ոլորտի շրջանառությունը 2024 թվականին աճել է 14,5%-ով, սակայն այն ներառում է նաև մոլախաղային հարթակների և բուքմեյքերական գրասենյակների համար ծրագրային ապահովման մշակումը։
