Իրանի խորհրդարանի խոսնակ Մոհամմադ Ղալիբաֆը հայտարարել է, որ օտար երկրները չպետք է միջամտեն տարածաշրջանային խնդիրներին, և հարցերը պետք է լուծվեն հենց տարածաշրջանի երկրների միջև։
Այս մասին Իրանի խորհրդարանի խոսնակը հայտարարել է Ադրբեջանի խորհրդարանի խոսնակ Սահիբա Գաֆարովայի հետ հանդիպմանը։
«Մենք չենք ընդունում օտարերկրյա ուժերի որևէ միջամտություն տարածաշրջանում, և տարածաշրջանային հարցերը պետք է լուծվեն տարածաշրջանի երկրների միջև, իսկ հարցերը կարող են քննարկվել «3+3» ձևաչափով հանդիպումների մակարդակով և նպաստել տարածաշրջանային խաղաղությանն ու կայունությանը»,- հավելել է նա։
Գաֆարովան ևս ընդգծել է «3+3» ձևաչափի կարևորությունը՝ նշելով, որ արտատարածաշրջանային խաղացողների մուտքը հանգեցնում է լարվածության, և տնտեսական ու հումանիտար հարցերը լուծելիս իրենք չպետք է թույլ տան, որ երրորդ երկրները խաթարեն այդ գործընթացը։
«Ես կարծում եմ, որ ներկա իրավիճակում հարևան երկրները, ինչպիսիք են Իրանը և Ադրբեջանը, պետք է ունենան ավելի սերտ և խորը կապեր»,- ընդգծել է Գաֆարովան։
