ԱՄՆ ազգային անվտանգության խորհրդական Մայք Ուոլցը Fox News-ին ասել է, որ Ուկրաինայի նախագահ Վլադիմիր Զելենսկին պետք է «մեղմի» ԱՄՆ-ի հանդեպ իր քննադատությունը և «լուրջ վերաբերի» առաջարկված գործարքին. գրում է The Guardian-ը։
Այդ գործարքը ենթադրում է Վաշինգտոնին 500 միլիարդ դոլար արժողությամբ բնական ռեսուրսների, այդ թվում՝ նավթի և գազի հանձնում:
Ուոլցը նշել է, որ Կիևը սխալ է վարվում՝ հակադրվելով ԱՄՆ նախագահի՝ Մոսկվայի հետ խաղաղ բանակցությունների մոտեցմանը, հաշվի առնելով այն ամենը, ինչ ԱՄՆ-ն արել է Ուկրաինայի համար: Նա հերքել է մեղադրանքները, թե ԱՄՆ-ն անտեսել է Ուկրաինային և Ամերիկայի եվրոպական դաշնակիցներին՝ այս շաբաթ Ռուսաստանի հետ բանակցություններից նրանց բացառելով: Դա սովորական «մաքոքային դիվանագիտություն» էր, ասել է նա:
«Կիևից հնչող որոշ հայտարարություններ և նախագահ Թրամփին ուղղված վիրավորանքներն անընդունելի էին»,- ավելի ուշ լրագրողներին Սպիտակ տանը հայտնել է Ուոլցը՝ հավելելով․ «Նախագահ Թրամփը, բնականաբար, այժմ շատ հիասթափված է նախագահ Զելենսկուց՝ այն բանի համար, որ նա չի նստել բանակցությունների սեղանի շուրջ և չի ցանկացել օգտվել մեր առաջարկած հնարավորությունից»:
