ՀՀ արդարադատության նախարար Սրբուհի Գալյանը ԵՄ-Հայաստան խորհրդարանական գործընկերության կոմիտեի նիստում անդրադարձել է ժողովրդավարության և օրենքի գերակայության ամրապնդմանն ուղղված քայլերին։ Այս համատեքստում նա կարևորել է սահմանադրական փոփոխությունները՝ նշելով, որ դրանք ընթացիկ փուլում են։
«Գործում է համապատասխան խորհուրդ, մշակվել է սահմանադրության հայեցակարգը, և ներկայումս մենք աշխատում ենք սահմանադրության նոր տեքստի վրա, որը, ըստ ստանձնած պարտավորության, պետք է պատրաստ լինի մինչև 2026 թվականի ընտրությունները»,- ասել է Գալյանը։
Նրա խոսքով՝ սահմանադրությունը շեշտելու է մարդու իրավունքները, այդ թվում՝ սոցիալ-տնտեսական իրավունքները, ինչպես նաև ներառելու է մի շարք դրույթներ՝ կապված կառավարման կարգի և տարբեր պետական մարմինների դերի ու տեղի հետ։
Նա նշել է, որ հաջորդ կարևոր ոլորտը ընտրական բարեփոխումներն են։ «Հաջորդ կարևոր քայլը, որը նախատեսված է CEPA-ի շրջանակներում, մեր օրենսդրության մերձեցումն է ԵՄ օրենսդրությանը, և այս ուղղությամբ քայլեր արդեն ձեռնարկվել են։ 2024 թվականի ընթացքում 30-ից ավելի օրենսդրական նախագծեր արդեն իսկ մերձեցվել են ԵՄ օրենսդրությանը»,- ասել է նա։
