Սիրիայի ժամանակավոր իշխանությունները երեքշաբթի սկսել են երկար սպասված ազգային երկխոսության համաժողովը՝ փորձելով գծել երկիրը վերականգնելու ուղիները նախկին նախագահ Բաշար ալ-Ասադի պաշտոնանկությունից և շուրջ 14 տարվա քաղաքացիական պատերազմից հետո:
Դամասկոսում անցկացվող միջոցառումը կազմակերպել էր նոր իշխանությունը՝ նախկին իսլամիստական «Հայաթ Թահրիր ալ-Շամ» խմբավորման գլխավորությամբ, որը տապալել է Ասադի իշխանությունը դեկտեմբերի սկզբին: Համաժողովի կազմակերպիչները հայտնել են, որ հրավիրել են մոտ 600 մարդու Սիրիայի բոլոր համայնքներից, այդ թվում՝ կանանց և կրոնական փոքրամասնությունների ներկայացուցիչների։ Չէին հրավիրել քրդերի գլխավորած Սիրիայի դեմոկրատական ուժերին (ՍԴՖ):
Մասնակիցները բաժանվել են վեց աշխատանքային խմբի՝ քննարկելու անցումային արդարադատության համակարգը, սահմանադրությունը, պետական հաստատությունների կառուցումը, անձնական ազատությունները, Սիրիայի ապագա տնտեսական մոդելը և քաղաքացիական հասարակության դերը երկրում։
Սիրիայի անցումային շրջանի նախագահ Ահմեդ ալ-Շարաան միջոցառումն անվանել է երկիրը վերակառուցելու պատմական հնարավորություն:
Միջոցառման ավարտին ընդունված հայտարարությամբ համաժողովը դատապարտել է Իսրայելի ներխուժումը իր տարածքներ և կոչ արել դուրս բերել ՑԱՀԱԼ-ի ուժերը։
Իսրայելը Սիրիայի տարածքում զորքեր է տեղակայել ՄԱԿ-ի կողմից մշտադիտարկվող ապառազմականացված գոտում:
