Պետքարտուղար Մարկո Ռուբիոն դեմ է այն հայտարարություններին, թե Թրամփի վարչակազմը Ուկրաինային երկրորդ պլան է մղել Ռուսաստանի հետ շարունակվող պատերազմի մասին քննարկումներում։ Պետքարտուղարը այդ խոսակցությունները «ոչ ճշգրիտ» է անվանել։
«Ես կարծում եմ, որ նախագահը զայրացած էր, և դա արդարացի էր, այն փաստարկով, որ մենք, չգիտես ինչու, չենք խոսել Ուկրաինայի հետ»,-ասել է Ռուբիոն չորեքշաբթի Fox & Friends – ի եթերում:
Նա ընդգծել է, որ նախագահ Դոնալդ Թրամփը կապ է հաստատել Ուկրաինայի նախագահ Վլադիմիր Զելենսկու հետ Ռուսաստանի նախագահ Վլադիմիր Պուտինի հետ վերջերս ունեցած զրույցից անմիջապես հետո:
«Ես ներկա էի երկու զանգերին։ Նա անմիջապես զանգահարեց Զելենսկուն»,- ասել է Ռուբիոն։
Լրագրողի հարցին, թե վերջերս նսեմացվել է Ուկրաինայի դերը և բարձրացվել Ռուսաստանինը, Ռուբիոն արձագանքել է, որ նման բան չկա։
«Մենք նրանց [Ռուսաստանին] ասել ենք՝ տղերք, դուք ուզո՞ւմ եք վերջ տալ պատերազմին, թե՞ ցանկանում եք շարունակել: Եթե ցանկանում եք վերջ տալ պատերազմին, մենք կարող ենք խոսել այն մասին, թե ձեր տեսանկյունից ինչ կպահանջվի դրա համար։ Եթե ուզում եք շարունակել պատերազմը, պարզապես ասեք մեզ հիմա»,- ընդգծել է Ռուբիոն։
Ռուբիոյի խոսքով՝ ռուս պաշտոնյաները համաձայնել են հետագա հանդիպմանը, որի ընթացքում երկու կողմերի դիվանագիտական խմբերը կքննարկեն պատերազմը դադարեցնելու հնարավոր պայմանները:
