Այսօր ապամոնտաժվել է Սայաթ-Նովա 2/2 հասցեում գտնվող սրճարանը։ Երևանի քաղաքապետ Տիգրան Ավինյանը նույնպես ներկա էր և հետևում էր աշխատանքների ընթացքին։
«Մոտ 1000 քմ տարածքի վրա քանդման աշխատանքներ են իրականացվում։ Այս հատվածն ամբողջապես վերափոխվելու է ավելի կանաչ տարածքի, և վարձակալը չի շարունակելու իր պայմանագիրը։ Նա հանձնել է ամբողջ տարածքը քաղաքին»,- ասաց քաղաքապետը՝ նշելով, թե ինչով են կարևոր այս քանդման աշխատանքները։
Նրա խոսքով՝ տարիների ընթացքում Օպերայի շուրջ եղած կանաչ հատվածները էականորեն նվազել են, և ավելացել են սրճարանները.
«Մի քանի տարի առաջ արդեն իսկ սկսվել էին Օպերայի շրջակայքում մասնակի քանդման աշխատանքներ, իսկ այսօր արդեն իրականացնում ենք սկսված գործի շարունակությունը։ Եվ փուլ առ փուլ տարբեր հատվածներ մաքրելու ենք ընդհանուր սրճարաններից, և ավելի շատ կանաչապատ հատվածներ ենք ունենալու»։
