Դոնալդ Թրամփի վարչակազմը հստակեցրել է, որ Ուկրաինայի նախագահ Վլադիմիր Զելենսկին ԱՄՆ նախագահի հետ հարաբերությունները բարելավելու համար պետք է հրապարակային ներողություն խնդրի, շաբաթ օրը՝ մարտի 1-ին, Bloomberg-ը՝ վկայակոչելով եվրոպացի պաշտոնյային, փոխանցում է DW–ն։
Գործակալության աղբյուրի համաձայն՝ շատ եվրոպացի առաջնորդներ աջակցել են Ուկրաինայի նախագահին Սպիտակ տանը Թրամփի և Զելենսկու սկանդալային վիճաբանությունից և ուկրաինական պատվիրակության՝ Օվալաձև աշխատասենյակից վաղաժամ հեռանալուց հետո, սակայն ոմանք կոչ են արել նրան փորձել վերականգնել հարաբերությունները ԱՄՆ-ի հետ։ Օրինակ՝ ՆԱՏՕ-ի գլխավոր քարտուղար Մարկ Ռյուտեն Զելենսկու հետ հեռախոսազրույցում ասել է, որ այն, ինչ Թրամփը արել է Ուկրաինայի համար, պետք է հարգել և ընդգծել է, որ Զելենսկին պետք է ԱՄՆ-ի հետ հարաբերությունները վերականգնելու համար միջոց գտնի։
Զելենսկին Վաշինգտոնից մեկնել է Լոնդոն, որտեղ հանդիպել է Մեծ Բրիտանիայի վարչապետ Քիր Սթարմերի հետ։ Զելենսկու հետ հանդիպումից հետո, ինչպես Bloomberg-ին հայտնել է աղբյուրը, նա զանգահարել է Թրամփին և Ֆրանսիայի նախագահ Էմանուել Մակրոնին։ Գործակալության աղբյուրը չի հստակեցնում, թե ինչի մասին են եղել այդ խոսակցությունները, սակայն դրանք որակում է որպես «կառուցողական»։
