Հանուն խաղաղության պայմանագրի՝ Մոսկվան ստիպված կլինի համաձայնել եվրոպացիների կողմից Ուկրաինայի անվտանգության երաշխիքներին, իսկ Կիևը՝ տարածքային զիջումների գնալ. այս մասին CNN-ին տված հարցազրույցում հայտարարել է ԱՄՆ ազգային անվտանգության հարցերով խորհրդական Մայքլ Ուոլթսը։
Նրա խոսքով, «այս պատերազմը պետք է ավարտվի, բայց դրա համար անհրաժեշտ կլինեն զիջումներ»:
«Դա Ռուսաստանից անվտանգության երաշխիքների հարցում զիջումներ կպահանջի։ Դրա համար բանակցությունների սեղանի շուրջ պետք կգան բոլոր կողմերը»,- ասել է Սպիտակ տան Ազգային անվտանգության հարցերով խորհրդականը։
Միևնույն ժամանակ, Ուկրաինան ստիպված կլինի համաձայնել ինչ-որ տարածքային զիջման՝ անվտանգության ապագա երաշխիքների համար»,- ասել է Ուոլթսը: Սակայն, ինչպես նշել է նա, անվտանգության այդ երաշխիքները պետք է իրականացվեն Եվրոպայի կողմից։
Նա հավելել է, որ «մի բան պարզ է. մենք Ուկրաինային չենք տեսնում որպես ՆԱՏՕ-ի անդամ», քանի որ դա, ինչպես պնդել է պաշտոնյան,«ավտոմատ կերպով կներգրավի ԱՄՆ զորքերը հակամարտության մեջ»:
