Սխալ ձևակերպված հարցը չի կարող ունենալ ճիշտ պատասխան. Եղոյան

ԱԺ Եվրոինտեգրաման հարցերի մշտական հանձնաժողովի նախագահ Արման Եղոյանը, հակադարձելով «Հայաստան» խմբակցության պատգամավոր Արմեն Գևորգյանի՝ ԵՄ-ի անդամության մասին օրենքի համատեքստում աշխարհաքաղաքական դիրքավորման վերաբերյալ դիտարկմանը, նշեց՝ նախագիծն արտաքին հարաբերությունները և Հայաստանի արտաքին քաղաքականության շահերը դիվերսիֆիակացնելու մասին է։

«Եվ այստեղ ամեն ինչ մեկ զամբյուղում չի գտնվում։ Ֆրանսիայի հետ հարաբերությունները աննախադեպ խորացել են։ Ինչպե՞ս կարող ենք այն չգնահատել։ Այսօր Հայաստանը զենք է գնում Ֆրանսիայից։ Մի բան, որը երբեք չի եղել։ Դրա վերաբերյալ ինչո՞ւ չեք ասում կամ ինչո՞ւ չեք գնահատում, որպես արտաքին քաղաքական կամ աշխարհաքաղաքական։ Իմ համոզմամբ, քանի որ այս հարցերը չունեն պատասխաններ, ձեր հարցերն էլ չեն կարող ունենալ պատասխաններ, որովհետև հարցն ինքնին սխալ է ձևակերպված։ Սխալ ձևակերպված հարցը չի կարող ունենալ ճիշտ պատասխան»,- ասաց Եղոյանը։

Գևորգյանն էլ հակադարձեց, թե իր եվրոպական և ամերիկյան կրթությունը թույլ է տալիս հարցը ձևակերպել։