ԱԺ նախագահ Ալեն Սիմոնյանն անդրադարձել է վարչապետ Նիկոլ Փաշինյանի՝ այսօր հրապարակած հոդվածին, նշելով, որ խաղաղության պայմանագիրը քննարկման փուլում է. «Ունենք արդեն 15 համաձայնեցված կետ, որ համարում եմ մեծ, շատ մեծ ձեռքբերում»։
Ըստ նրա, երբ խաղաղության պայմանագրի շուրջ նոր սկսվել էր խոսակցությունը, ընդամենը 5 միջազգայնորեն ընդունված կետի մասին էր խոսք գնում։ Անդրադառնալով էսկալացիայի վտանգին, նա նշեց. «Պետք է ամեն ինչ անենք, որ նման առիթ ու պատճառ չլինի։ ՀՀ-ն որևէ տարածքային պահանջ չունի և իր հանձն առած պարտավորություններին ու համաձայնագրերին շատ ուժեղ հետևում է, և հետևողականորեն շարունակելու է աշխատանքը՝ խնդրահարույց հարցերը լուծելու ուղղությամբ»։
Սիմոնյանը նաև շեշտել է. «Էսկալացիայի վտանգ կա, բայց էսկալացիայի առիթ ու պատճառ չկա»։
Ըստ ԱԺ նախագահի՝ իրադարձությունները շատ արագ են զարգանում. «Եւ կարող է մոտ օրերս շատ հետաքրքիր զարգացումներ լինեն։ Կարող են նորություններ տեղի ունենան ու փոփոխություններ լինեն»։
