«Ինտերնետ շահումով խաղերի վերաբերյալ ընդունված սահմանափակումները չեն գործում, որովհետև դեռևս չունենք խաղային օպերատոր». այս մասին խորհրդարանում հայտարարեց ԱԺ ՔՊ խմբակցության պատգամավոր Հայկ Սարգսյանը՝ ընդգծելով, որ խաղային օպերատորի մասին հարցը բարձրացրել է դեռևս 2022թ. հունվարին։
Ըստ նրա՝ խաղային օպերատորի մասին օրենքի նախագիծը քննարկվեց ավելի քան 2 տարի և ընդունվեց 2024-ի ամռանը՝ ուժի մեջ մտնելով 6 ամիս անց՝ 2025թ. հունվարի 1-ից։
«Այս պահին ունենք ուժի մեջ մտած օրենքի նախագիծ, որը չի գործում։ Ցավոք սրտի, չունենք խաղային օպերատոր և որևէ սահմանափակում չենք կարող այս պահին կիրառել»։
Պատգամավոր Լիլիթ Ստեփանյանը հարց հնչեցրեց, թե բարձրացնելով շահումով խաղեր կազմակերպող ընկերությունների հարկային բեռը՝ կարողանալու՞ են կանխել խաղամոլության տարածումը։
Հայկ Սարգսյանը պատասխանեց, որ այս փուլում պետք է կոչ անել, որպեսզի չխաղան և դուրս գան վիրտուալ մոլախաղերից, ինտերնետ շահումով խաղերից, քանի որ այն տանում է կործանման։
«Որևէ մեկը չի կարող գումար վաստակել ինտերնետ շահումով խաղերում գումար վատնելով։ Բացառված է»։
