7 տրիլիոն 130 միլիարդ դրամն առաջին հայացքից վախենալու մեծ թիվ է, բայց ուզում եմ պարզություն մտցնել. սա ընդհանուր շրջանառությունն է ոլորտի, որը խաղային հաշիվները լիցքավորած թիվը չէ: Խաղային հաշիվները լիցքավորած թիվը ուղիղ 10 անգամ պակաս է: Այդ մասին այսօր՝ մարտի 4-ին Ազգային ժողովում խաղային ոլորտի կարգավորման նպատակով հարկային բեռի ավելացման մասին նախագծի քննարկման ժամանակ, ասաց «Քաղաքացիական պայմանագիր» խմբակցության պատգամավոր Արեն Մկրտչյանը:
«Առաջին հայացքից տպավորություն է, որ ՀՀ-ն մարդկության պատմության և Երկիր մոլորակի ամենախաղամոլ պետությունն է, որտեղ պետբյուջեի համարյա կրկնակիի չափով խաղադրույքներ են կատարվում»,- ասաց նա՝ հավելելով, որ խաղային հաշիվներն իրականում լիցքավորվում են մոտ 700 մլրդ դրամով, որը, սակայն, նույնպես շատ մեծ թիվ է:
Արեն Մկրտչյանը թվարկեց նաև այն քայլերը, որոնք արվել են այս ոլորտի կարգավորման ուղղությամբ, և այժմ կան արդյունքներ:
«Մենք արել ենք քայլեր՝ փակելով բուքմեյքերական գրասենյակները, որոնք ամեն բակում կային, սահմանափակել ենք արտաքին գովազդը, ավելացրել ենք հարկերը, սկսել ենք հարկել շրջանառության հարկով, արգելել ենք վճարային տերմինալներից վճարել խաղային հաշիվները:
Սա ի՞նչ արդյունք է տվել: Սա տվել է հետևյալ արդյունքը. 2025 թվականի հունվարը՝ 2024 թվականի հունվարի հետ համեմատած, ՀՀ-ում խաղացող մարդկանց թվաքանակը նվազել է 20 տոկոսով, իսկ ոլորտի ընդհանուր շրջանառությունը կրճատվել է 6 տոկոսով: Սա նշանակում է, որ քայլերը սկսել են արդյունք տալ»,- ասաց նա:
Պատգամավորը նաև ընդգծեց՝ կողմ է, որ պետք է սահմանափակվի ոլորտի գործունեությունը, բայց մտավախություն ունի, որ ՀՀ քաղաքացիները կարող են հաշիվներ բացել օտարերկրյա կազմակերպություններում, քանի որ եթե ՀՀ-ում արգելվեն կամ սահմանափակվեն շահումով խաղերի կայքերը, ապա քաղաքացիները կարող են հաշիվներ բացել այլ երկրներում գործող կազմակերպություններում:
