ԱԺ նախագահ Ալեն Սիմոնյանը հայտարարել է, թե 152 հաստատված գերի է եղել, և նրանց բանակցությունների, տարբեր միջնորդների միջամտությամբ վերադարձրել են։
«Չորս տարվա ընթացքում 150-ից ավելի գերի հետ ենք բերել, հիմա մնացել է հաստատված 23 հոգի, որոնցից 11-12-ը Ղարաբաղի նախկին ղեկավարներն են»,- ասել է նա։
Ըստ ԱԺ նախագահի, մնացած գերիների վերադարձի խնդիրը Հայաստանի համար առաջնային է, և այդ հարցերը քննարկվում են բոլոր հնարավոր հարթակներում. «Իրենք մեր հայրենակիցներն են, և իրենց վերադարձի հետ կապված բոլոր քայլերն արվել են ու արվելու են»։
Նա նշել է, թե հաշվի առնելով, թե ինչ հեռահար նպատակներ կան այդ դատավարություններն իրականացնելով, «Այս փուլում շատ դժվար է լինելու, բայց դա չի նշանակում, որ փորձերն ու աշխատանքներն այդ ուղղությամբ չեն շարունակվելու»։
Սիմոնյանը նաև նշել է, թե Բաքուն գերիների «լծակն» օգտագործել և շարունակելու է օգտագործել «քաղաքական առևտուր անելու համար, ինչն արվեց COP-29-ի ժամանակ»։ «Կարելի է անընդհատ մանիֆեստային, կենացային, լավը թվալու համար տեսախցիկների առաջ ասել բացարձակ ճշմարտություններ, բայց դրանք գործնական բան չունեն»,- շեշտել է նա։
