«Նախագահ Թրամփը հստակ հայտարարել է, որ ձգտում է խաղաղության։ Մեզ անհրաժեշտ է, որ մեր գործընկերներն էլ հավատարիմ լինեն այդ նպատակին։ Մենք կասեցնում և վերանայում ենք մեր օգնությունը՝ համոզվելու համար, որ այն նպաստում է խնդրի լուծմանը»,-ասել է Սպիտակ տան պաշտոնյան։
Կասկածներ կան, որ Թրամփը կասեցրել է այն ռազմական օգնության մատակարարումները, որոնք նախկին նախագահ Ջո Բայդենը հաստատել էր՝ Պենտագոնի պահուստներից զենքի մատակարարման (PDA) ծրագրի շրջանակում։ Բայդենի հաստատած օգնության փաթեթները ներառում էին արկեր, հրթիռներ և այլ զինատեսակներ։ Թրամփի նախագահության ընթացքում ԱՄՆ-ն շարունակել է մատակարարումները, սակայն Ուկրաինան չի ստացել Բայդենի օգնության փաթեթների բոլոր բաղադրիչները։
Անհասկանալի է՝ արդյոք ամերիկյան զինվորականները կշարունակե՞ն Ուկրաինային տրամադրել արդեն մատակարարված զենքերի համար անհրաժեշտ ռազմամթերք, ինչպես նաև հետախուզական տվյալներ՝ կապված ռուսական հրթիռային հարվածների հետ, նշում է Reuters-ը։
Թրամփի վարչակազմի բարձրաստիճան պաշտոնյան հայտնել է WSJ-ին, որ ԱՄՆ նախագահի ազգային անվտանգության բոլոր գլխավոր խորհրդականները հավանություն են տվել ռազմական օգնության մատակարարման կասեցմանը՝ այս հարցի շուրջ մի շարք հանդիպումներ անցկացնելուց հետո։
The Wall Street Journal-ի հաղորդմամբ, Թրամփն իր որոշումը կայացրել է այն բանից հետո, երբ Զելենսկին հայտարարել էր, որ «պատերազմի ավարտի համաձայնագրից դեռ շատ հեռու ենք»։ Թրամփը, զայրացած այս հայտարարությունից, որոշել է ցույց տալ, որ լուրջ է տրամադրված Ուկրաինային բանակցային սեղանի շուրջ նստեցնելու հարցում։ «Ուկրաինացիները չէին կարծում, որ մենք լուրջ ենք։ Մենք պետք է դա ցույց տայինք»,-ասել է վարչակազմի ներկայացուցիչը։
Գործող և նախկին ամերիկյան պաշտոնյաները հայտնել են WSJ-ին, որ Թրամփի վարչակազմը ավելի վաղ դադարեցրել էր Ուկրաինային նոր սպառազինությունների վաճառքի ֆինանսավորումը։
Վերլուծաբանների կարծիքով՝ ամերիկյան ռազմական մատակարարումների դադարեցումը կսահմանափակի Ուկրաինայի հնարավորությունները՝ դիմագրավելու ռուսական հարձակումներին։ Բացի այդ, Կիևը չի կարողանա լիարժեքորեն իրականացնել հեռահար հարվածներ և պաշտպանել իր թիկունքային դիրքերը, գրում է WSJ-ը։
Սպիտակ տունը դեռևս պաշտոնապես չի մեկնաբանել որոշումը։ Պենտագոնը չի տրամադրել մանրամասներ, իսկ Ուկրաինայի նախագահի գրասենյակը և Վաշինգտոնում Ուկրաինայի դեսպանատունը չեն արձագանքել Reuters-ի հարցմանը։
