Տուգանային 9 միավորը 13 դարձնելու նախաձեռնությունն առաջացել է վարորդների խնդրանքով. Սիմոնյան

Տուգանային 9 միավորը 13 դարձնելու նախաձեռնությունն առաջացել է վարորդների խնդրանքով: Այդ մասին Ազգային ժողովի՝ փետրվարի 4-ի նիստին ասաց ԱԺ խոսնակ, նախագծի համահեղինակ Ալեն Սիմոնյանը՝ տեղեկացնելով, որ անձամբ իրեն են մոտեցել վարորդներ և ասել, որ նման խնդիր կա:

«Ուսումնասիրել ենք և հասկացել, որ, այո՛, կոնկրետ սեգմենտ կա, որոնց համար սա աշխատանքի բերումով խնդրահարույց է: Դա ոչ միայն տաքսու վարորդներն են, այլև այն մարդիկ են, որոնք զբաղվում են առաքումով և այլն, և այլն…

Սա որևիցե կերպ չի վերաբերում մարդկանց, որոնք խախտում չեն արել, և իրենք կսկսեն ավելի շատ [խախտում] անել: Չէ՛, այն մարդը, որը խախտում չի անում, չի անում, ուզում է 9 լինել, 13, թե 103»,- ասաց Ալեն Սիմոնյանը:

ԱԺ խոսնակն անդրադարձավ նաև ազդանշան տալու խնդրին՝ նշելով, որ այն ևս պետք է կարգավորել, առաջարկեց խստացնել «սիգնալ տալու ավանդույթը»:

«Մեկը սիգնալ է տալիս, մյուսը երկար սիգնալով պատասխանում է, հետո մյուսը երկու հատ կարճ է տալիս, մի հատ՝ երկար… Մի ամբողջ լեզու է ձևավորվել սիգնալով իրար հայհոյելու, մեքենա վարելու ընթացքում իրար հետ հարաբերություններ պարզելու, որը հետագայում վերածվում է կռվի, ռազբորկեքի առիթ է դառնում… Իրար սիգնալ տալը եկեք խստացնենք»,- ասաց նա: