ԱԺ «Հայաստան» խմբակցության ղեկավար Սեյրան Օհանյանը համոզված է, որ գերիների հետ կապված հարցը Ադրբեջանի հետ բանակցային սեղանին պետք է լինի մշտապես։ «Այդ ուղղությամբ իշխանություները պետք է համապատասխան աշխատանք տանեն՝ այդ հարցը բարձրացնելով և երկկողմ բանակցություններում, և միջազգային հարթակներում»,- ասել է Օհանյանը՝ հավելելով, որ եթե անգամ գաղտնի աշխատանք է տարվում, այն չպետք է բացառի հրապարակային աշխատանքին։
Օհանյանը նշել է, թե այդ հարցն իր լուծման ամենաարդյունավետ հարթակում պետք է բարձրացվի, այն է՝ միջազգային հարթակները։ Օհանյանը հիշեցրել է, որ գերիների վերադարձի հարցը նոյեմբերի 9-ի եռակողմ հայտարարության մաս է, բայց չի կատարվում. «Անընդհատ հրաժարվելը, Ադրբեջանին անընդհատ զիջելը ոչ մի լավ տեղ չի տանում»։
Պատգամավորի խոսքով, Բաքվում կեղծ դատավարություն է իրականացվում. «Այդ դատավարությամբ դատում են ոչ միայն նշված անձանց, այլև՝ Արցախի ինքնորոշման իրավունքը և մեղադրանքների սլաքներն ամբողջությամբ ուղղում դեպի Հայաստանի Հանրապետություն»։
