Ռուսաստանի Դաշնության Ազգային հակաահաբեկչական կենտրոնը հաղորդագրություն է տարածել մարտի լույս 5-ի գիշերը Դաղստանի ինքնավար հանրապետության Կասպիյսկ քաղաքում «ահաբեկչական խմբավորում վնասազերծելու մասին»: Ըստ պաշտոնական աղբյուրի՝ ուժային կառույցներին հաջողվել է «ոչնչացնել չորս ահաբեկչի, որ ծրագրել էին հարձակում գործել ՆԳՆ տեղական կառույցի դեմ»:
Հաղորդվում է, որ իրավապահների եւ քաղաքացիական բնակչության շրջանում «կորուստներ չկան»: Ռուսաստանի հատուկ ծառայությունների տեղեկացվածությամբ՝ «ահաբեկիչները գործել են «Իսլամական պետության» ուղղորդմամբ»: Կասպիյսկում է տեղաբաշխված Ռուսաստանի Ռազմա-ծովային ուժերի Կասպյան նավատորմիղի շտաբը, այնտեղ են հանգրվանում ռազմանավերը:
Բացառված չէ, որ ահաբեկչության թիրախ պետք է լիներ հենց այդ ռազմահենակայանը: Դաղստանում իսլամական արմատական տրամադրությունների տարածման մասին ռուսաստանյան մամուլն ահազանգում է տարիներ շարունակ:
Անցյալ տարի Regnum-ի թղթակիցը տեղեկություն է հայտնել, որ ինքնավար հանրապետության տարածքում «չի հանդիպում Ուկրաինայում «հատուկ ռազմական գործողության» ոչ մի խորհրդանիշ, մինչդեռ Պաղեստինի դրոշներն ամենուր են»:
Նույն աղբյուրը հայտնել է լեռնային գյուղերից մեկում ուկրաինական ռազմաճակատից վերադարձած երիտասարդի նկատմամբ դաժան հաշվեհարդարի մասին. նրան սպանել են ընտանիքի անդամների աչքի առաջ, անիծել այդ տունը, քանի որ «նրանք անհավատ ռուսների հետ կռվել են»:
Անհանդուրժողականությունն այն աստիճան է, որ սպանվածի հարազատները ոստիկանությանը ցուցմունք չեն տվել՝ երկյուղ ունենալով, որ իրենք էլ կդառնան վրեժխնդրության զոհ:
Դաղստանում, ինչպես ռուսաստանյան մի շարք թելեգրամ-ալիքներ են հաղորդում, առկա է «կրոնապետություն հռչակելու իրական սպառնալիք»:
Հայտնի է դեպք, երբ Մախաչկալայի քաղաքային պոլիկլինիկայի ռուս բժշկուհուն աշխատանքից ազատել են, քանի որ հիվանդ կնոջն ստուգելու համար խնդրել է, որ նա «նիկաբը թողնի ընդունարանում»: Հարազատները բժշկուհու քայլը գնահատել են «իսլամի ավանդույթների դեմ անարգանք»:
Բնակչության շրջանում իսլամական արմատականության տարածմանը նպաստում է համատարած կոռուպցիան, հովանավորչությունը, որ ծնում են սոցիալական անարդարություն: Ինքնավար հանրապետությունը տնտեսական լուրջ հնարավորություններ չունի, հիմնականում գոյատեւում է դաշնային բյուջեից ստացվող լրավճարների հաշվին: Նման պայմաններում, ինչպես ռուսաստանցի փորձագետներն են կարծում, աճում է հոգեւորականների հեղինակությունը, իսկ «ահաբեկչական խմբավորումներին անդամակցությունը դիտվում է որպես եկամուտի աղբյուր»:
Իրական ի՞նչ պատճառներ են դաղստանցիներին մղում դեպի իսլամական կրոնապետություն կամ արտաքին ի՞նչ ուժեր են նպաստում դրան, անշուշտ, Ռուսաստանի հատուկ ծառայությունների եւ քաղաքական ղեկավարության լիազորությունների տիրույթի հարց է: Ռուսաստանում ահազանգում են, որ ուկրաինական ռազմաճակատը «նպաստում է արմատական տրամադրությունների աճին»: Եթե այլ վայրերում դա դրսեւորվում է դաժան հանցագործություններով, ապա իսլամադավան ինքնավարություններում կտրուկ մեծանում է կրոնական «մոլեռանդությունը»: Վերջին մեկ տարում միայն Դաղստանում տասնյակ ահաբեկչություններ են իրականացվել: Մախաչկալայում նույնիսկ Ռուս ուղղափառ եկեղեցու հոգեւոր սպասովոր է սպանվել: Հյուսիսային Կովկասում, այսպիսով, իսլամական քարոզչությունը գերիշխում է, եւ առկա է «կրոնապետություն հռչակելու» շատ իրական սպառնալիք:
Թիվ 1 սյունակ, Վահրամ Աթանեսյան
