Խաչատուր Սուքիասյան/այցեքարտ

Վախենում է տգետից, հավատում՝ Աստծուն, իսկ իր թույլ և ուժեղ կողմն է համարում բարությունը։

Տնտեսական և քաղաքական գործիչ, հայտնի գործարար, ԱԺ նախկին պատգամավոր
ծնվել է 1961 թ. Երևանում։
Դպրոցն ավարտելուց հետո աշխատել է Աբովյանի «Սիրիուս» գործարանում` որպես փականագործ։
Աշխատանքային գործունեությանը զուգահեռ 1980-1985 թթ. սովորել է Երևանի պոլիտեխնիկական ինստիտուտի հաշվողական տեխնիկայի ֆակուլտետում ճարտարագետ-սիստեմատեխնիկ մասնագիտությամբ։

1985 թ. – ինստիտուտն ավարտելուց հետո, նշանակվում է «Սիրիուս» գործարանի տեղամասի պետ, այնուհետև` արտադրության պետ, իսկ 1989 թ. նշանակվում է տնօրեն։ 1991-1992 թթ. աշխատել է որպես «Վան» գործարանի տնօրեն։ Եղել է Ինֆորմատիկայի միջազգային ակադեմիայի թղթակից անդամ։
1992-1994 թթ. – աշխատել է Հայաստանի արդյունաբերության նախարարությունում` որպես արտաքին տնտեսական կապերի գլխավոր վարչության պետ, նախարարի խորհրդական։
Այնուհետև ամբողջովին զբաղվում է ընտանեկան բիզնեսով, որի սկիզբը դրվել է դեռ 1987 թվականին, երբ Խորհրդային Միությունում թույլատրվեց կոոպերատիվների գործունեությունը։
1996 թ. – ընտանիքին պատկանող բոլոր արտադրական, շինարարական ձեռնարկություններն ու սպասարկման օբյեկտներն ընդգրկվում են «ՍԻԼ Կոնցեռն» ՍՊԸ-ում, որի նախագահն է եղել մինչև 2005 թ., երբ ՀՀ Սահմանադրության նոր տարբերակի համաձայն հրաժարական է տալիս կոնցեռնի նախագահի պաշտոնից և մնում այդ կառույցում որպես ձեռնարկությունների բաժնետեր։

Լուսանկարում՝ Խաչատուր Սուքիասյանը տիկնոջ հետ

«Հայէկոնոմբանկ» ԲԲԸ-ի հսկիչ փաթեթը պատկանում է Սուքիասյանների ընտանքին։ Այս բանկի բաժնետերերից է նաև Վերակառուցման և Զարգացման Եվրոպական բանկը (25 տոկոսը)։
Խաչատուր Սուքիասյանը հանդիսանում է inLOBBY GmbH ընկերության նախագահը։ Ընկերությանն է պատկանում առցանց հյուրանոցային պատվերների ամրագրման գլոբալ համակարգ։
1999 թ. – Երևանի թիվ 12 ընտրատարածքից, 2003 թ. թիվ 15 ընտրատարածքից, այնուհետև 2007թ. թիվ 10 ընտրատարածքից ընտրվել է ԱԺ պատգամավոր։ Խաչատուր Սուքիասյանը եղել է ԱԺ ֆինանսավարկային և բյուջետային մշտական հանձնաժողովի անդամ, մասնակցել է նաև Եվրոպական կառույցներին ինտեգրման հարցերի ժամանակավոր հանձնաժողովի աշխատանքներին։
2008 թ. մարտի 4-ին ՀՀ Ազգային ժողովի համաձայնությամբ ներգրավվել էր որպես մեղադրյալ «Մարտի 1-ի» գործով։
2009 թ. – հրաժարական է տվել և վայր դրել ԱԺ պատգամավորական մանդատը։
Խաչատուր Սուքիասյանն ամուսնացած է, ունի երկու երեխա։

Լուսանկարում՝ Խաչատուր Սուքիասյանը որդու հետ

Սուքիասյանների ընտանիքում չորս եղբայր են եւ մեկ քույր։ Խաչատուր Սուքիասյանը եղբայրներից ավագն է։ Սուքիասյանների հայրը` երջանկահիշատակ հայտնի գործարար Ալբերտ Սուքիասյանը, ծնվել է Երեւանում, իսկ մայրը ծնվել է Բաթումիում։

Լուսանկար՝ Խաչատուր Սուքիասյանի որդու հարսանեկան արարողությունից

Սուքիասյան եղբայրները նաեւ բիզնես գործընկերներ են. հյուրանոցային, առեւտրային համալիրներ, «Սիլ պլազա», սննդի կետեր, հագուստի խանութ, կահույքի, հյութերի արտադրամաս, բանկ. այս ամենը պատկանում է Սուքիասյանների ընտանիքին։

Լուսանկարում՝ Խաչատուր Սուքիասյանը թոռնիկների հետ

Եղբայրները ղեկավարում են նաեւ բարեգործական հիմնադրամը. «Սուքիասյան» բարեգործական հիմնադրամի կողմից պարբերաբար իրականացվում են տարաբնույթ բարեգործական ծրագրեր, այդ թվում` սոցիալական եւ կրթական` հիմնադրամին տարեկան հատկացված բյուջեի շրջանակներում: Ավանդույթ են դարձել նաեւ ամանորյա բարեգործական ծրագրերը: